Baztango Geroa Bairen ustez, «kezkatzekoa da Bildu-Baztango Ezkerra gobernu taldea ez dela gai izan 2013ko aurrekontua dagokion epean onartzeko. Larria da, batetik, urtea hasi aurretik onartu egin behar baita urte horretarako aurrekontua, legeak eta zentzuak berak adierazi bezala. Baina, bestetik, eskandalagarria da gainontzekoei gardentasun falta leporatzen dieten horiek, egun arte, sikiera egin beharrekoaren ildo nagusi eta orokorrik eman ez izana. Udal buletinean, denori bezala, guri ere ezarriko zaizkigun murrizketen berri ematen dute, baina, jakin nahiko genuke urte honetan zehar zertan gastatu edota inbertituko dituzten baztandarron baliabideak».
Honekin batera, Baztango Udalaren ekimen ekonomiko falta salatu du Geroa Baik, izan ere, «egun bizi dugun garai kritiko honetan, bailarako sektore eta eragile ekonomikoei laguntzeko ez da batere neurririk edota ekimenik proposatzen ari. Zorionez, bailaran badira sektore ezberdinen promozio ekonomikorako lanean ari diren elkarteak eta, horien lana goraipatzearekin batera, Udalari horiek laguntzeko eta babesteko» eskatu diote.
Bilduk eta Baztango Ezkerrak egiten duten gauza bakarra gastua kontrolatu eta beraiek heldu zireneko martxan ziren zerbitzuak mantentzea dela uste du Geroa Baik. «Ez dute beste inolako ekimenik proposatu, ez bederen Baztango ekonomia bizkortze aldera». Egun bizi dugun krisi egoeraren aurrean honelako gabeziak onartezinak direla uste du Geroa Baik. «Aktibitate ekonomikoa bizkortuz gero, bailarak baliabide ekonomikoak lortuko lituzke; aldiz, udal honek nahiago du hemengo familiak presionatu, espediente berresle zigortzaileak banatuz han-hemen, une larri eta gordin honetan», diote Baztango Geroa Baiko kideek.