Baztandarren Biltzarrak mende erdia bete du aurten. Bestarekin lotzen dute batzuek izen hori, baina hurbiletik bizi dutenek besta baino askoz gehiago irakurtzen dute hitz horien atzean. Mikel Iriarte da horietako bat. Baztandarren Biltzarreko zuzendari kargua bete zuen zortzi urtez. Iragana, oraina eta etorkizuna izan ditugu hizpide. Eguna ez ospatzeko mamua sarritan inguruan ibili bada ere, «jendea gauza guztien gainetik inplikatu» dela dio. Bere ustez, oinarrizkoena lortu da, «bazegoen eta badago aitzinerat segitzeko gogoa».
E. IRAOLA
Zein da 50. urteurrenera iristeko sekretua?
Aunitz urte dira, baina pentsatzen dut erreleboak izan direlako iritsi dela kopuru honetara. Bidean aunitz gora behera eta gertaera izan dira. Garai desberdinak bizi izan ditugu, batzuk nahiko larriak ere bai. Baina nonbait jendea gauza guztien gainetik inplikatu egin da. Bazegoen eta badago nahia honekin aitzinerat segitzeko.Egun berezia da. Erreferente bat izan da aunitzendako eta oraindik ere garai batean etortzen zen jendea etorri egiten da. Agian, lorpen bat bezala ere gogoratzen da.
Antolaketa egiteko modua aldatu da?
Baztandarren Biltzarra hasiera batean egun bakarrera mugatzen zen baina urteekin elkartearen beharra ikusi eta sortu zen. Hasierako urteetan oztopo aunitzi egin behar izan zitzaion aurre. Udalek lagundu beharrean trabak jartzen zizkizuten, fabore eske joan beharra izaten zen eta horrela ere ez zen behar zen laguntza lortzen.Denborarekin instituzioetan ere eboluzio bat egon da eta orain normalizatua dago eta laguntza ere eskaintzen dute. Elkartearen antolakuntzan berriz, generazio desberdinetako jendea ibili da. Gaur egun jende nahiko gaztea da hor dabilena, nahi edo behar adina ere ez. Jende falta dagoela diote. Garai errazak bizi izan ditugu. Jendeak nahiago izan du besta egin lanean aritzea baino.
Egunak berak jasan du aldaketarik?
Gehiegi ez da aldatu egitaraua. Orgen apaingarriak egiten dira, herri bakoitzak berea eramaten du urtero, hasieratik gainera eta horrekin batera herri bazkaria ere egiten da bai.Garai batean ia ia orga denek izaten zuten gai tradizionalen bat. Aldarrikapenak ere ez ziren falta izan, 80. hamarkadan gehienbat. Gaur egun denetarik dago, baina lehengo aldean, aunitz indar hartu du antzerkiak. Ez da bakarrik gauza estatiko bat. Jendearen parte hartzea bultzatu eta pasarteak kontatzen dira. Horrek bizitasun handia ematen du. Nik uste hori jendeak baloratzen duela.
Garai zailak izan ditu, etorkizuna nola ikusten duzu?
Krisi ekonomikoak baino gehiago kezkatzen nau, erreleborik ez egoteak. Hori ez gertatzeko berrantolaketa bat beharrezkoa da. 50 urtez iraun dugu eta orain elkarteari zer eskatzen diogun planteatu beharko litzatekeela uste dut. Nola izan behar lukeen, nola funtzionatu... garai batean Baztango jarduera kultural, politiko eta sozial guztiak Baztandarren Elkartearen eskutik egiten ziren eta orain guztia alderantziz da. Hainbat eta hainbat talde daude eta bakoitzak bere aldetik egiten du lan. Elkarrekin harremanetan jarri eta koordinazio lanak egin behar dituztela iruditzen zait. Zentroak Baztandarren Biltza-rra behar luke izan.
50. urteurrena dela eta zer antolatu da?
Urteurrena ospatzeko proposamen desberdinak ari dira lantzen. Asmoetako bat da herri bakoitzean ekitaldi desberdinak egitea. Horrela uztailera iristen garenerako herri guztietan girotzeko eta urteurrena ospatzeko zerbait egina egonen da.
Baztandarren Biltzarrean egon ez denari zer erran?
Animatu eta etortzeko. Bailara euskaltzale batera etorriko dela eta bertako jendea ezagutuko duela. Aunitzetan Baztandarrak tuku-tuku izatearen fama dugu. Etortzen badira ikusiko dute ez garela horrela eta badugula zer konta.
ETORKIZUNA
«Garai batean Baztango jarduera kultural, politiko eta sozial guztiak Baztandarren Elkartearen eskutik egiten ziren eta orain guztia alderantziz da. Hainbat eta hainbat talde daude eta bakoitzak bere aldetik egiten du lan. Elkarrekin harremanetan jarri eta koordinazio lanak egin behar dituztela iruditzen zait. Zentroak Baztandarren Biltzarra behar luke izan»