Gaur egungo egoera latza salatu eta eskualdean lan egin eta bizitzeko eskubidea aldarrikatzeko kontzentrazioa eginen da asteartean. ELA, LAB eta EHNE sindikatuek deituta, arratsaldeko zazpietan elkartuko dira Elizondoko plazan. Aldarrikapenaz gain, beren burua eskaintzen dute egoerari irtenbidea bilatzeko «garbi daukagu irtenbidea ez dela murrizketekin eta eskubide galerarekin etorriko, eta garbi daukagu Nafarroako Gobernuari gure eskualdeaz arduratzea eskatu behar diogula, gu ere Nafarrak garelako eta ezin dugulako eskualdea hiltzen utzi». Egoera hau aldatzeko, irtenbideak planteatu eta inbertsioak egin behar direla aipatzen dute «dagoen aberastasuna banatu behar da, eta herriaren beharretan inbertitu, herriak eta bailarak modu egoki eta jasangarrian garatzeko».