Hemendik gutxira hasiko dira Elizondon ur biltegi berria egiteko lanak. Iturri-Ederra elkarteak horrela, ur gehiago pilatzeko aukera izan eta uraren presioarekin dauden arazoak konpondu nahi ditu. Lau eskaintza aurkeztu ziren eta Doneztebeko Mariezkurrena enpresarena aukeratu zuten. Hamar hilabeteko epea izanen dute lanak akitzeko. 1.300 metro koadroko eraikina izanen da, eta horretarako 4.111 metro koadroko lursaila erabiliko dute Zaldarriagan, ur biltegi zaharra baino gorago, hilerritik hurbil. 1950. hamarkadan egin zuten orain Elizondo urez hornitzen duen Antzanbordako biltegia.
Berriaren edukiera egungoa baino lau aldiz handiagoa izanen da, orain 400.000 litroko edukiera du eta berrian 1,7 milio litro ur sartuko dira. Ur hornikuntzaren presioa ere hobetuko da, Elizondoko etxebizitza altuenetara ura behar den bezala iristea bermatuz. Hala ere, ez dute Antzanbordako ur biltegi zaharra botako. Zaharrak hornituko du ur biltegi berria eta berritik herrira banatuko da ura. Ur hornidura erregulatzea izanen da biltegi berriaren eginbehar garrantzitsuenetakoa. Lanek 774,227 euroko kostua izanen dutela aurreikusten da.