Erratzun bizi den artista kataluniarrak, erakusketa berria aurkeztuko du Elizondoko Arizkunenean. Azaroaren 17tik abenduaren 9ra arte Diana Iniestaren lanak ikusteko aukera izanen da. Eraskusketa asteburu eta jai egunetan 12:00etatik 13:30era eta 18:00etatik 21:00etara dago zabalik. New Yorken egindako egonaldi baten ondotik artistak sortutako lanen bilduma da larunbatean aurkeztuko duena. Marrazki eta olioetan, erretratu eta irudiak landu ditu gehienbat. Eskultura bat ere egin du 'Puzzle de detalles' izena eman diona.
Erakusketaren gai nagusia olioan egindako pertsona biluzien irudiak dira. Erakusketa ia ia monokromoa da, apaindura gehiegirik gabeko trazoa baliatzen du artistak ikusle bakoitzak obraren interpretazio pertsonalagoa egin dezan «ikuslea nahasi dezaketen apaindurak albo batera utzi ditut, argiaren, begiradaren, keinuaren… lehenengo inpresioaren bila aritu naiz. Ikuslea obrara modu indibidualean gerturatzea nahi dut, bakoitzak bere modura interpreta dezan».