Lizartzuko bazkaleku komunaleko iskindegi edo hesidura guztia berrituko du, orain artiokoa guztiz deseginik eta urraturik baitago. Lan honek 154.000 euroko kostua izanen du (BEZ barne). Kopuru horretatik udalak 94.000 euro ordainduko ditu eta gainerako 60.000 euroak Cederna-Garalurren laguntzari esker ordainduko dira. Nekazaritza azpiegituretako urteko planean onartua egon arren, murrizketa politikaren ondorioz, lan hauek ez dute Nafarroako Gobernuaren diru-laguntzarik izanen.
Modu berean kontuan hartu behar da iskindegiaren egoera txarraren ondorioz aurten baserritar guttiagok egin dutela bertan aziendak kontzeko eskaera –hamabortzek– eta, horrela, iaz baino buru guttiago izan dira; 2012an denera 29 behi eta miga, 104 behor eta pottoka eta 220 ardi sartu dituzte. Iskindegia berrituta baserrietako produkzioak atxekitzeko eta iraunarazteko behar-beharrezkoak diren bazkaleku komunalen eskaintza hobetuko da eta horrela baserritarrek gure ekonomiaren, gizartearen, ingurunearen eta kulturaren iraupenean duten garrantzia segurtatuko.