Jo ala Jo taldeak antolatzen duen Kirikoketa bestak hamahirugarren edizioa beteko du urriaren 20a Arizkunen. Sagardoa egin ostean, jotzen zen musika tresnaren izena darama bestak, baina egitaraua ez da horretara mugatzen. Sagardoa egiteko prozesu osoa ikusi, musika eta jan-edanerako aukera izanen da Arizkunen.
10:45ean ibilaldia eginen da Arizkungo herritik barna Gamioxarreako Dolaretxera, musikariekin, sagar joleekin, asto eta sagarrekin, erraldoi eta dantzariekin. 11:00etan ate irekitzea izanen da. Segidan, sagar jotzea, estutzea,zuku dastaketa eta kupelaratzea eginen dira. Lanak akitutakoan, Kirikoketa Jotzea eginen da. Bitartean: Nafarroako Sagardoen dastaketa, taloak, artisauak, gaztainak, musika, azalpenak eta bertze izanen dituzte Gamioxarrea inguruan. 14:30ean bazkari Herrikoia antolatu dute 120 lagunendako. Txartelak ohiko lekuetan daude salgai (Intza, Ilargi eta Zubipunta ostatuetan). Egunean bertan ere erosteko aukera egonen da. Bazkalondoan,18:30 aldera herritik barna berriro ere Gamiorantz joanen dira kantu, dantza eta soinuekin. Gamioko kupelategian 19:00ak aldera bigarren estutzea eginen baita Pottoka musika taldeak kontzertua eskaintzen duen bitartean. Aurtengo Kirikoketa Eguna behar den bezala akitzeko, 21:00etan Trikidantz taldearen kontzertua izanen da.