Elizondoko Casinoren jabetza argitzeko txosten juridikoa agindu du Udalak. Casino elkartea egin ahal izateko Udalak bere garaian lurzoruaren 100 urteko emate edo zesioa egin zuen. Geroztik 100 urteak pasatu dira eta, orain gutti, Casinoko kideak eraikina elkartearen izenean jartzeko tramiteak egitera udaletxerat joan direlarik, paperetan Casinoren inguruko jabetza eskubiderik ez dagoela ikusi ahal izan da, hau da, Casino elkarteak ez duela eraikinaren gaineko jabetzaren dokumentaziorik. Gauzak horrela, eta egoera zein den argitze aldera, Udalak beharrezkoa ikusi du txosten bat egitea eta horretarako Eusko Ikaskuntzarekin duen akordioa baliatuz, artxibategi ezberdinetan Casinoren egoerari buruzko ikerketa egiteko erabakia hartu du. Argitu beharrekoa Casino elkarteak eraikinaren gaineko jabetza eskubidea ote duen da. Txostena egiteak 7.400 euroko balioa du eta lan hori hiru hilabetez luzatuko da.
Eraikina jabetza publikokoa dela argitzen bada, Udalak adierazi du helburua ez litzatekeela bertan egin dituzten inbertsioen eta lanen ondotik, Casino elkartea kanporatzea eta eraikina hustuaraztea, eraikinaren jabetza publikoa aitortuz oraino zehazteko dagoen akordio bat egitea baizik, eta horren arabera, erabilera eskubidea arautzea. Jabetza elkartearena dela argitzen bada, Udalak behar diren tramiteak eginen ditu ofizialki hala azaltzeko. Jabetza publikoaren defentsa administrazio publikoaren lanean lehentasunezkoa izan behar duela uste du.