«Garagardoa gustatzen bazaizu... Ezin duzu hutsik egin!». Horixe bera erranez, gonbidapena luzatu du Baztan Errugbi Taldeak irailaren 29rako antolatu duen lehenbiziko garagardo feriarako. Elizondon izanen da. 12:00etan karrika eta ostatuetan barna Bavariar poteoa eginen da, musikaren laguntzarekin. Ondotik, 25 euro balio duen bazkaria eginen da eta prezio horren barne, txerri-ukondoa, saltxitxak, patata purea, garagardo litro bat eta oparia sartuko dira. Txartelak Intza, Txokoto eta Futbolin ostatuetan paratu dituzte salgai. DJ Mokordok (Tirri&Tery) arratsaldea alaituko du, baina horrez gain, egun osoan haurrendako puzgarriak, hainbat garagardo dastatzeko aukera, saltxitxak, bokatak... izanen dira.