Basartea enpresaren ekimenez, Nafarroan Burricleta zentroak ireki dituzte, eta bat Oronoz-Mugairin. Landa, natur edo gastronomiako turismoa egiteko era desberdina proposatzen duen ekimena da, eta menditik ahaleginik egin gabe joateko alokatzen den bizikleta elektrikoa da. Audio gida duen GPSa du, pasatzen den lekuetan interesgarria zer den erraten duena.
Oronoz-Mugairiko zentroak zazpi ibilbide proposatzen ditu, gustu eta zailtasun desberdinetakoak: Bidasoko bide berdetik igarotzen direnak, edo Bertizarana, Malerreka eta Bortzirietako herrietan barna ibiltzen direnak, Bertizko Natur Parkea edo gaztandegiak eta errotak bisitatzen dituztenak. Bertzelako proposamenak ere bildu dituzte, hala hola, Hendaiara joateko aukera bi egunetarako.
Esleitu diren obrak
Hainbat obra esleitu ditu Tokiko Gobernu Batzordeak uda honetan eta denak eskaintzarik merkeenei. Zahar etxean egongelako leihoetan pertsianak jartzeko obrak Urtxulutegi enpresari esleitu zaizkio 5.371,59 eurotan eta zahar etxean pladurrezko pareta altxatzeko lana Ti-Tau erreformak-i agindu zaio 1.757,67 eurotan. Erratzuko eskolan leiho berriak jartzeko lanak Urtxulutegiri esleitu zaizkio 6.506,38 eurotan; Elbeteko frontoian konponketak egiteko lana Pinturas y Obras Hnos Sarmineto enpresari esleitu zaio 7.014,73 eurotan.