Lekaroz eta Iruritan herritarren ur horniketaren bermea kolokan dagoela jakinarazi zuen Udalak abuztu erdialdera. Egun horietan erabilgarri zegoen ur kopurua nabarmen jaitsi zen eta Lekarozko ur biltegia hustutzear zegoela ikusi zuen Udalak. Egoeraren aitzinean, Lekarozko biletegia zisternen bidez hornitzearen beharra nabarmendu zuen.
Udalak oroitarazi duenez, 2008-2012 urtetako tokiko azpiegitura planean Irurita-Lekarozko uraren arazoari konponbidea bilatzeko proiektuaren bigarren fasea gauzatzea aurreikusia zegoen eta «lan hauek ez dira burutu Nafarroako Gobernuak erraten duelakoz ez daukala berari dagokiona ordaintzeko dirurik».
Egoeraren larritasunaren aitzinean, eta herritarren oinarrizko eskubideak bermatzen ez direla ikusita, Nafarroako Gobernuari lehenbailehen Irurita-Lekarozko ur horniketa bermatzeko egin behar diren lanak egiteko dirua bideratu dezala eskatu dio Udalak.
Bertze aldetik, Lekarozko eta Iruritako herritarrei eskatu die bandoaren bitartez iragarri diren neurriak bete ditzaten eta ur erabilera arduratsua egin dezatela egoera okerrera joan ez dadin.
Bandoa
Ur eskasia dela eta, Lekaroz eta Iruritako herrietan zenbait neurri hartu behar izan ditu Udalak. Tartean, ura kenduko da 00:00etatik 07:00etara.
Horrez gain, debekatu egin du lorategiak eta baratzeak ureztatzea, igerilekuak betetzea, ibilgailuak garbitzea eta etxeko giza kontsumorako ez den bertze edozein erabilera. Herritarren laguntza eskatu du Udalak, «kontsumo arduratsua eginez, ura alferrik erabili gabe, egoera konpondu arte».