Haien ametsa gurea da lelopean ikuskizun artistiko-musikala prestatu dute uztailaren 21ean Amaiurko Gazteluaren magalean eskaintzeko. Kanta, dantza eta poesiaren bidez, ehun bat lagunek parte hartuko duten ikuskizunean eta Nafarroa euskalduna zela azaldu nahi dute. Azken entsaio orokorra igandean egin zuten Amaiurren.
Pier Paul Berzaitzen zuzendaritzapean eta Haien ametsa gurea da lelopean, kanta, dantza eta poesiaren bidez Nafarroa euskalduna zela azaldu nahi dute, eta nafarren borondatearen kontra, Gaztelak armak erabiliz konkistatu zuela erresuma. Horretarako amaiurtar eta baztandarrez gain, Nafaroa Garaia eta Beherea, Gipuzkoa, Lapurdi eta Zuberoatik etorritako ehun lagun inguruk parte hartuko dute ikuskizunean. Gazteluaren magalean antzeztuko dute eta lau zati edo gertalditan banauta. Ikuskizuna 21:00etan hasiko bada ere, 20:00etan desfilea eginen dute parte hartzaileek eta horrez gain, egun berean, hainbat ekitaldi izanen dira: 10:00etatik goiti orduro bisita gidatuak gaztelura, artisauak, musika karriketan, arratsaldez haurrendako animazioa eta tailerrak eta egun osoan jateko eta edateko ostatuak.
Hau guztia prestatzen Mauleko Gazteluaren Lagunak Elkartearekin elkarlanean ari da Gaztelu Elkartea, eta hala, agorrilaren 10ean eta 11n ikuskizun bera eskainiko dute Mauleko gazteluan.
Ikuskizunerako sarrerak agortuak daude dagoeneko.