Otsailetik ekainera bitarteko buletina atera du UPNk eta Udal Gobernuaren hainbat alderdi kritikatu ditu. Urtebete pasatu da Udal Gobernu berria osatu zenetik, eta horren harira, «alferrik galdu den urtea» izan dela iritzi dio UPNk, «Gobernu Taldekoek axolagabe segitzen dutela» erranez.
Aroztegiko proiektuaz dio, «berak ukatzen badu ere, Garbiñe Elizegi dela oraindik Aroztegia eta gero zer? plataformako presidentea. Plataformaren estatutuetan bera ageri da». Proiektua geldiarazteko nahi dituzten txostenak Udala ordaintzen ari dela salatu du, «kalte-ordain garestiak pagatu behar izatearen arriskuan jartzen du alkateak Udala».
Udal komisio irekien gainean zera dio alderdi erregionalistak: «alditik aldira jende guttiago biltzen dute eta komisioetara, gai bakan batzuk eramaten dituzte soilik».
Magnaren proiektuaz ere ari da UPN: «alkatea ez da gauza izan bere betebehar legalak konplitzeko eta oraindik ez dio igorri Kintoko Mankomunitateari Balleko Etxeak osoko bilkuran hartu zuen erabakia baimenduz Magnak eskatutako lurren desafekzioa». Ezkerrari, berriz, «beraien batzarrean Magnaren alde erabaki ondotik, orain isildu eta jakinaren gainean egonik ere, egoera hau lasai aski onartzen duela» leporatu dio.
Almandozko harrobiaren gainean, «bertze inori onartuko ez zizkioten baldintza eta egoera batean lanean segitzea onartzea» egotzi dio Udal Gobernuari. Lanean hasteko udal baimenik ez duen harrobia dela dio.
Inbertsioez bere iritzia ere eman du: «Nafarroako Gobernuaren ehunka milaka euroko diru-laguntzak itzultzeko gauza den Udal Gobernu Taldea dugu, eta diru-laguntza horiei bizkarra eman eta nahiago du diru-laguntzarik gabeko bertze inbertsio batzuk egin». Beti «kalaka berdina» dutela dio UPNk: «zernahi dela errua Gobernuarena da».
Diru kontu batzuk ere ageri dira buletinean: «Udal Gobernu Taldeak dio ezin duela bere gain hartu 20.000 euroko gastua, azienda feria ‘nazionala’ egiteko. Hori bai, arazorik gabe bere gain hartzen ahal ditu bertze gastu batzuk, justifikatzeko zailak direnak. Lehentasun kontua da».
Osasun Zerbitzuen harira, «Udalak kontatu nahi izan ez digunaz» ari da UPN. Gobernu Taldearen jokabidean, Garbiñe Elizegi buru duela, kezkagarriak diren jarrerak daudela dio, «bere betebehar eta udal konpromisoaren aitzinetik pankarta jarriz. Afera politikoen aldarrikapena bertze edozein helbururen gainetik». Osasun Zerbitzuen inguruko informazioa «ez-osoki eta arras manera manipulatuan, beraien interesen arabera, gizarteratzen ari direla», iritzi dio.
Duela urte batzuk saihesbide sarrera-irteeren zirkulazioa berrantolatzeko plan bat egin zela azaldu du UPNk, «saihesbidea ireki zuten momentuan plan hori indarrean egoten ahal zen, baldin eta arreta pizarren bat eman izan balitzaio». Duela hilabete batzuk, UPNk Elizondoko karriketan zirkulazioa berrantolatzeko bertze plan bat proposatu zuela ere badio buletinak. «Gaia zirkulazio komisiora eramanen zutela erran ziguten, eta komisio horretara ez dute inoiz deitu, existitu ere ez baita existitzen».
Giltxaurdi kudeatzeko enpresa publikoaren aldeko apustua egina du Udal Gobernuak, eta UPNk «enpresa publikoaren estatutuei errekurtsoa sartu dio. Bere ustetan, «prozedura eta formazko akatsez gain, ez dira errespetatu ere egin, eta ‘osoki diru publikoarekin eginen den Udal Enpresa Publikoaren Proiektua’ dioen dokumentuan onartezina dela iruditzen zaigun bertze arrazoi bat ere bada». Igerilekua kudeatzeko egin nahi den enpresa honen gibeletik «udaletxe paralelo» bat ezkutatzen da UPNrendako.
Udalaren gestioa ere aipatu du azken urteotako gestioarekin alderatuz: «udalbatzar kopuru haundieneko garaia (2008-2009) erreferentzia bezala hartuta, jarduera %62 murriztu da». Dioenez, «doblatu da alkateak bakarrik hartutako erabakien kopurua, urte osoko udalbatzarretan tratatutako puntu kopuruarekin konparatuta».