Aitzineko Udalak Loizu hiltegiaren kudeaketa berria esleitu zuen agintaldi hondarrean. Eta oraingo Udalak, hiltegia arautegiaren eskakizunetarat egokitzeko hainbat lan egin ditu. Oraingoz 17.000 euro bideratuko direla jakinarazi du Jon Elizetxe zinegotziak.
Egin beharreko lanak zehazteko Nafarroako Gobernuko Osasun Publikoaren Institutuarekin bildu dira udal ordezkariak eta hala, hasteko, azienden sarbidea hobetzeko alaka edo txaflana egin da pareta batean. Gisa berean, heia berriaren proiektua eta bertzelako lanen proiektua idazteko Udalak 1.500 eurotan ingeniaria kontratatu du.
Bertzalde, ur-araztegian sarea jarriko da, hegaztiek hiltegitik ateratzen diren haragi hondarrak jan ez ditzaten. Gainerakoan, animalien tripetako kakak eta aziendak kamioietan eramaten direnean ekartzen dituzten azpiak eta gisakoak biltzeko ongarriendako lehorpea eginen da.
Aziendak hil aitzinean zorabiatzeko erabiltzen den tresneria ere berrituko da 2.500 eurotan eta azienda ttikiak hiltzeko (zerriak, ardiak eta bildotsak) ataka berezia eginen da, 3.000 eurotan. Heian ur-kazpelak ere paratuko dira, animalien ongizate sailetik hala eskatu dutelako.
Moldaketa hauekin hiltegia arautegirat moldatu bidenabar, «orain artio jasotzen zituen isunak saihestu nahi dira», azaldu digu Elizetxek. «Ondotik, hiltegiaren gainean, lehen sektorea egituratzeko proiektu publiko enpresarial bat egiteko pausuak emanen dira».
HILTEGIAREN INGURUKO FOROA
Hiltegiaren inguruan eztabaidatzeko foro bat osatzea proposatu du Nekazaritza Batzordeak eta ekaineko aktan ageri denez, foro hori abuztuaren 8an eginen da, 20:00etan.