Udal Gobernua osatu eta urtebetera balorazioa egin zuten ekainean Udal Gobernu Taldeko ordezkariek prentsaurrekoan. Bigarren boletina ere kaleratu dute xehetasun gehiagorekin.
Batetik, aurrekontuak ditu hizpide. 2012rako 8.462.631 euroko aurrekontua onartu du: «iazkoa baino %4,7 handiagoa bada ere –aitzineko agintaldian inbertsioetarako utzitako diruagatik–, murrizketa gogorrak izan dira». Aurtengo aurrekontua egiterakoan, bi baldintza nagusi izan direla dio: «Nafarroako Gobernuaren bidegabeko mozketak eta Udalaren 8.348.607,56 milioi euroko zorra». Gobernuak gastu arrunterako udalari egin behar zion transferentzia 54.604 eurotan guttitu duela adierazi du, eta Udalak bere gain hartu behar izan duela gastua. Gisa berean, langile-funtzionarioen soldatak izozteko erabakia gehitu du. Bertzetik, Udalak duen zorra dela eta, Udalak inbertsioak egiteko mailegurik ezin duela eskatu gogoratu du. Aitzitik, gastu arrunta berrantolatuta, 134.630 euro aurreztu direla dio Udal Gobernuak, eta horrek zerbitzu sozialak indartzeko baliabide ekonomikoak lortzea ahalbidetu duela. Hala ere, gastu arruntean 97.245 euro murriztu omen dira.
Trabaturik dauden inbertsioez ere badihardu, lehentasunenen arabera inbertsioak berrantolatu direla kontatuz: «premiagatik uholdeen kalteak konpontzeko lanak onartu dira eta behar sozialagatik herrietarat ura eraman ahal izatea eta pista batzuen moldaketa». Gaineratu du, «Udalak inbertsioak modu errealistan berrantolatu eta gero dauden sos pizarrekin lehentasuna dutenak egiteko, Nafarroako Gobernuaren kudeaketa ezin txarragoagatik ez duela lan horiek egiteko laguntzarik jasoko».
Piriniar arrazako behien feriaz ere ari da Gobernu Taldea, iazkoak 47.000 euroko gastua eragin zuela erranez. Kontuak oraino zuritu gabe daudela dio: «Aspina eta babesle gehienek beren partearen handiskoena ordaindu badute ere (3.700 euro falta oraino), Nafarroako Gobernuak ez du bere zatia (15.250 euro) ordaindu. Gainera, Amaiurko abuztuko ardien feriako 3.675 euroak ere pagatu gabe ditu. Oraingoz, diru hori Udalak jarri behar izan du». Gisa berean, 2012ko aurrekontuetan feriak egiteko diru kopurua iazko 50.000 euroetatik aurtengo 25.000tarat jautsi duela azaldu du, eta aurtengo 25.000 euro horiek iaz agindutako dirulaguntza ordaintzeko erabiliko dituela. Feriak ez egitekotan, ardura Gobernuarena dela azpimarratu du.
Herrietako lan ttipiak aldizkatuz egiten ari direla ere ageri da buletinean: bide eta karriken mantenimendua, harri-lubetak, mendi lanak... Udal berriarekin gisa horretako 22 lan egin omen dira.
Nafarroako Gobernuaren murrizketak tarteko, Elizondoko Frantzisko Jabier ikastetxeko lanetara Udalak ekarpen ekonomiko haundiagoa egin behar izan duela ere ageri da buletinean, baita Udal Plana idazteko prozesu parte hartzailea ere. Hiltegia arautegira moldatzeko lanak ere aipatu ditu, eta kultur jarduerak diruz laguntzeko eskabide bakarra aurkeztu behar dela oroitarazi du, eta laguntzak eskatzeko epea urte osoan irekia egonen dela.
Hirigintzako arau hausteengatik ere ohartarazi du. Etxean zernahi lan egin behar dela ere, baimena behar dela dio, eta baimena jaso arte ezin dela lanekin hasi, horrek isunak eta espediente irekiera ekartzen ahal dituelako. Udalak, mahai gainerat etorri zaizkion espedienteak tramitatuko ditu, eta legea betearazi eta arau-hausteak jarraitzeko protokolo bat eginen duela iragarri du
Giltxaurdi enpresa publiko batek kudeatzeko apustuaz ere mintzo da, eta osasun zerbitzuak murrizteko Gobernuaren asmoa ere kritikatu du.
Karriken garbiketa antolatu duela ere azaldu du Gobernu Taldeak: Elizondon hilabeteko lehen eta hirugarren astelehen eta astearteetan kenduko dira kartel eta pankartak eta hirugarren asteko astelehen edo asteartean mangera pasako da. Bertze herrietan hilabeteko lehen astean kenduko dituzte kartelak.
UDAL BOLETINA
Udal Gobernu Taldea