Euskal Herriko segalari txapelketaren finalerdiak jokatuko dira ekainaren 30ean, larunbat arratsaldeko 17:00etatik aitzinera Erratzuko Iñarbil auzoan. Segalariak ordu erdiko txandetan ariko dira, ahalik eta belar-kilo gehien ebakitzeko helburuarekin, baina txukuntasuna ere kontuan hartuko da zigortzerako orduan. Sarrera 10 euro kobratuko da.
Lehenbizizko finalerdian Jon Kanflanka (Leitza, 31 urte), Garikoitz Etxeberria (Amasa-Villabona, 29 urte) eta Mikel Alkorta (Asteasu, 41 urte) ariko dira. Bigarren finalerdian, berriz, Juan Joxe Lizaso iazko txapelduna (Asteasu, 51 urte), Angel Maguregi bizkaitarra, Jon Intxaurbe (Zeanuri, 36 urte) eta duela bi urte Euskadiko txapeldun izan zen Jesus Mª Ormaetxea “Urki” (Orendain, 36 urte) lehiatuko dira.
Finalerdi bakoitzeko lehenbiziko bi postuetan sailkatzen diren lau segalariek finala jokatuko dute uztailaren 15ean Leitzan, eguerdiko 12:00etan.