Herrietako alkateek eskatuta, murrizketei buruz solasteko Batzar Nagusiaren ez ohiko bilkura egin zen ekainaren 12an eta bilera hartara UPNko zinegotzi taldea agertu ez izana «onartezina dela» salatu du Ezker Abertzaleak. UPN-PSNren gobernua «animaleko mozketak egiten ari dela» kritikatu du ohar bidez eta gaineratu du, «horren ondorioak Nafarroako herritar eta langile guztiak jasaten ari garela». Mozketa «ikusgarrienak» hezkuntza eta osasungintzan izaten ari dira eta horrekin, «neketan eraikitako ongizate estatu eskasa desegin nahi dute», adierazi du Ezker Abertzaleak. Aldiz, Iruñeko agintaritzako bulegoetatik UPN eta PSNko buruek «Nafarroako Kutxa desegin biztartean kutxatik sekulako dietak jaso dituztela» kritikatu du eta «Yolanda Barcinak lan gehiago egin eta guttiago kobratu behar dela erran, eta bere soldata %33 igan duela».
Horrekin batera azaldu du, «Abiadura Handiko Trena egiteko ehunka milioi gastatzen ari diren biztartean, Oronozko etengabeko arretagunea kendu nahi dutela edo Lekarozko ur-hartzea eta Amaiurko ur-depositua egiteko dirurik ez dela erran dutela». Ezker Abertzalearen irudiko, Batzar Nagusiak herritarrei eraginen dieten mozketei buruz eztabaidatzeko deitutako ez ohiko bilkurarat UPNkoak ez agertzea ikaragarrizko itsuskeria da, jarrera kakati eta koldarra bertzerik ez da». Gisa berean, Begoña Sanzberro ez agertu izana «bereziki lotsagarritzat» jo du, «parlamentari izanik bera eta gainera, hainbat zesantia eta gisako kobratzen, Udalari buruz direnak eta ez direnak erranez hanpaturik eta harro ibili bidenabar».