Diario de Noticias egunkariak Udal Gobernuko kideen soldaten inguruan argitaratutako berri «maltzurrari» buruz, Udal Gobernuko Taldeak prentsa oharra kaleratu du. Bildu eta Ezkerraren ustez, «Nafarpress delakoak berria amorrudun eta azpikeriadun lerroburuarekin hasten du, udal kontuei buruz daraman ildo editorial tendentziosoa mailarik gorenerat eramanez eta, aldi berean, onargarriaren muga guztiak gaindituz. Nafarpressen gibelean gorderik idazten duenaren pozoina ez da gehiago jasaten ahal». Gaineratu du, «udalbatzar berriko kideen soldatak aitzinekoenak baina apalagoak direla; orain Udalak kargu politikoen soldatetan 41.000 euro aurrezten ditu».
Soldatak lanorduen, dedikazioaren eta kargu horien arduren azpitik daudela dio Gobernu Taldeak: «Garbiñe Elizegiren soldata garbia hilabeteko 1.304,11 eurokoa da, 14 ordainekoa da eta %80an liberaturik dago. Mikel Ortega %100ean liberaturik dago eta bere soldata garbia 1.511,50ekoa da eta, Jon Elizetxerena 749,20 eurokoa; eta bere dedikazioa lanaldi erdikoa». Alkate eta alkateordearen kasuan, «astero 45 ordu baina aise gehiago ematen dituzte lanean eta Jonek bere liberazioari dagozkion 25 orduak gainditzen ditu. Egunero 08:00etarako beren lantokietan egoten dira», dio idatziak.
Gainerakoan dietak eta kilometrajeak behar bezala justifikaturik daudela diote eta «oraingo Udal Gobernukoen lan egiteko modu serio eta zintzoa ezagutzen duen edonork badaki zenbat joan-etorri egin behar izaten dituzten eginbeharren barnean». Aurtengo aurrekontua 2011koa baino 2.000 euro ttikiagoa dela jakinarazi dute.
Bertzalde, udal batzordeetan baztandarrek horien berri jakiteko kamarak paratzea ongi legokeela uste du Udal Gobernuak, «zeren UPNek batzorde horietarat gainerako ordezkariak baino gehiago joaten dela diolarik, baztandarrek ikusiko lukete horietan egotea eta gauzak egitea ez dela gauza bera; eta hori da UPNekoen kasua; gehienetan batzorde horietan egon bai, baino ez dute deus egiten».
Bildu eta Ezkerrak oharrean diotenez, «zenbakiak argiak dira eta lan politiko eta publikoaren ordain estu bati erantzuten diote». Akitzeko, jakinarazi nahi diote «bai UPNri eta bai bere diskurtsoaren bozgorailu izan nahi duen guztiari prest gaudela eztabaida publiko baterako nahi duten leku eta orduan, lan politikoa egiteagatik kobratu dena eta kobratzen denaren inguruan».