Hilabetero bezala, apirileko berripaper elektronikoa kaleratu du Bilduk. Aldi honetan, Giltxaurdi kirol instalazioen kudeaketaz eta Aroztegiko proiektuaz ari da.
Giltxaurdiko kudeaketaz dio, Giltxaurdi S.L. enpresa publikoa sortzeko erabakia maiatzaren 3an egindako osoko bilkuran hartu zuela Udalak, Bilduren eta Ezkerraren aldeko botoekin, NaBai2011ren abstentzioarekin eta UPNren aurkako botoekin. Oraingoz, enpresa berriaren administrazio kontseiluan Bilduren bi ordezkari eta Ezkerraren, UPNren eta NaBai2011ren bana daude. Halere, berripaperean ageri denez, «Bilduren borondatea administrazio kontseiluan erabiltzaileen eta langileen ordezkariak ere egon ahal izatea litzateke».
Enpresa publiko berriak oraingo langileak subrogatuko dituela dio Bilduk eta kudeatzailea kontratatzeko lehiaketa publikoa eginen dela. Kudeaketa publikoa uda ondotik hasiko da eta bitartean oraingo enpresak segituko du.
Aroztegiko proiektuaren inguruan, Udalak eskatutako txosten juridikoaren berri eman ondotik, proiektu urbanistikoa geldiarazteko plan partzialaren behin betiko onarpenaren berrikusketa egitea onartu duela Udalak oroitarazi du Bilduk. Orain espedientea Nafarroako Kontseilurat eramanen da eta honek loteslea den irizpidea emanen du.