«Zinegotzi kargua erantzukizun eta koherentzia politiko printzipioetan oinarrituta hartu nuen. Aitzineko zinegotziak zituen ardurak hartu nituen, Tokiko Gobernu Batzordean partehartzearena barne. Udal talde guztiek parte har dezakete organo honetan; ondorioz, egiten ez duenak horretan lanik ez egitea erabaki duelako da, bertzerik gabe». Halaxe adierazi zuen Maite Iturre NaBai 2011ko zinegotziak maiatzaren 15ean eskainitako prentsaurrekoan. Asun Fernandez de Garaialde parlamentaria izan zuen ondoan. Aipatu zuenez, «NaBai 2011k agintaldi hasieratik normaltasunez parte hartu izan du Tokiko Gobernu Batzordean».
Karguari eusteko asmoa duela berretsi zuen: «udal bizitzaren garapena hobetzeko etengabeko saiakeran oinarritu beharko litzateke, iraganeko akatsak onartuz eta konpontzen saiatuz. Asmo horrekin hartu nuen kargua eta karguari eutsiko diot agintaldiaren amaiera arte, edonorren gogoz kontra bada ere».
Turismo eta merkataritza arloko zinegotzia da Iturre, eta ardura «sektoreak duen garrantzia aintzat hartuz, eta alor honetan lan egiteko aukera ikusita» hartu zuela erran zuen. «Helburua bailararen alde lan egitea da, asko egiteke dagoen sektore batean, botere, lehia eta ika-mika pertsonaletan sartu gabe». Kargua Bilduk eta Ezkerrak sinatutako gobernu akordioan sartu behar izan gabe hartu zuela ere azaldu zuen: «zinegotzi batek gobernuaren parte izan gabe kargua hartzea ez da inolaz ere salbuespeneko afera Nafarroan». Gaineratu zuenez, «hemen gaude eta zinegotzigo hau hartu dugu, Baztani ezkerreko ikuspuntu eta konponbideak emateko. Ez gaude UPNren jarraikeriarik egiteko ezta interes partikularren zerbitzura jokatzeko ere». Baztandar guztiei eta «doike, azken udal hauteskundeetan hauteskunde zerrenda osatu zuten pertsona guztiei atea irekita» utziko diela ere erran zuen.
Bere zinegotzi lanetik desmarkatuz idatzia kaleratu zuen NaBai 2011 elkarteari ere zuzendu zitzaion: «idazkiaren egileei deia luzatu nien aurpegia eman zezaten, babes taldearen laburduraren gibelean ezkutatu gabe. Ez dute egin, eta areago, modu berean segitzen dute». Gisa berean, «anonimotasunaz baliatzen direnei, NaBai 2011ko ordezkaritza usurpatu nahi dutenei ere, lankidetzan aritzeko eta Baztan hobetzeko konponbideak ekartzeko deia» ere egin zien.
Zigako hilerriaz eta Almandozko saihesbideaz aritu ziren babes taldekoak, eta horri buruz, «duela zenbait hilabete, 2012ko aurrekontuen onarpenaren harira, gaia Osoko Bilkuran eztabaidatu eta argitu zela» oroitarazi zuen. «Gaia berriz atera badute, Udal Gobernua kritikatzeko eta bereziki, ni udal ordezkari gisa deslegitimatzen saiatzeko izan da». Akitzeko, Baztan hobetzeko eta lan egiteko konpromisoa berretsi zuen.