Nafarroako Administrazio Auzitegiak, Udalak 2011ko urriaren 27an Batzorde Informatibo Iraunkorren berrantolaketen harira, Osoko Bilkuran hartutako akordioaren aurka UPNk sartutako gorako errekurtsoaren aitzinean epaia eman du. UPNk bi eskaera egiten zituen eta bat ukatu eta bertzea onartu du Auzitegiak. Ados ez egon arren, hurrengo osoko bilkuran sententzia onartu eta auzitegiak agindutakoa beteko duela jakinarazi du Udal Gobernuak.
Biztanleen kopurua dela eta, Udala legez behartuta dago Tokiko Gobernu Batzordea (astero egiten da), Ogasun Batzordea (hamabostero egiten da) eta Batzorde Informatibo Iraunkorrak (Osoko Bilkura bakoitzaren aitzinetik egiten da) eratzera. Hasieratik talde politiko guztiak gonbidatu dira guztietan parte hartzera, baina UPNk uko egin zion Tokiko Gobernu Batzordean parte hartzeari.
Agintaldi hasieran Batzorde Informatibo desberdinak zeuden, gai bakoitzeko bat, aitzineko agintaldiko eskema segitu zelakoz. Bilera bakoitzeko ordainsaria 100 eurokoa izatea erabaki zen, bakoitzak jasotzen ahalko zuen maximoa 600 euro izanik. Praktikan, batzorde informatibo hauek, batzutan 5 eta 10 minutu iraun arren, aldiro kopuru berdina ordaindu behar zitzaien zinegotziei. Hau dela eta, urriaren 27an hartutako erabakian, Udal Gobernuak Ogasun Batzordea eta Tokiko Gobernu Batzordeak garrantzi haundiagokoak zirela eta denbora gehiago eskatzen zutela eta, hauek bakarrik ordaintzea erabaki zuten. Aldi berean, Batzorde Informatibo Orokor bakarra egitea erabaki zen gai guztiak aldi berean tratatzeko, Euskara izan ezik, Ordenantzak Batzorde berezi bat edukitzea eskatzen duelakoz.
UPNk akordio honen aitzinean gorako helegitea jarri zuen eta helegite honetan bi eskaera egin zituen. Batetik, Batzorde Informatibo Iraunkor Orokor bat egin beharrean gai bakoitzeko bat egitea, horrela gai bakoitzeko ordainsaria kobratuko lukete. Bertze aldetik, Batzorde guztiak berdin ordaintzea eskatu zuen, diskriminazioa leporatuz.
Nafarroako Administrazio Auzitegiaren sententziak ukatu egin du lehenbiziko eskaera eta bigarrena onartu du. Alde batetik, Udalari arrazoia eman dio erranez posible dela Batzorde Orokor bat egitea eta gai guztiak bilera berean tratatzea. Bigarren eskaeran auzitegiak onartu du garrantziaren arabera aukera dagoela batzorde batzuk ordaintzeko eta bertzeak ez, baina beren ustez, guztiek garrantzi berdina dutela. Beraz, denak berdin ordaindu beharko dira. Gisa berean, sententziak argi utzi du erabaki honek ez duela suposatzen alderdi politikoen arteko diskriminaziorik.
Udal Gobernuak jakinarazi duenez, «nahiz eta ados ez egon Auzitegiak batzordeen garrantziaren inguruan egindako interpretazioarekin», hurrengo osoko bilkuran sententzia onartu eta auzitegiak agindutakoa beteko du.