Neguko sute denboraldia akitu den honetan, Baztanen balantze gazi-gozoa egin du Jon Elizetxe ingurumen zinegotziak. Alde batetik, nekazarien partehartzea inoiz baino haundiagoa izan dela adierazi du, baina bertze aldetik, baimenik gabe ere su gehiago piztu direla.
EPRIF taldearen, basozainen, Oronozko suhiltzaileen eta nekazarien laguntzarekin 274,74 Hektarea erre dira, 31 erreketetan, eta «datu historikoa» dela oroitarazi du zinegotziak. Gaineratu duenez, «aurtengo helburuetako bat nekazari gehiagoren partehartzea zen, eta 300 pertsona baino gehiagok parte hartu izana datu pozgarria da, iazko 184ko zifra erraz gaindituz». Bertzalde, aurten nekazariek bere kabuz 37 erreketa egin dituzte 125,6 Hektarea errez.
Baina, tamalez, baimenik gabeko suak ere izan dira, iaz baino 13 gehiago. Guztira 96,65 Hektarea erre dira baimenik gabe, horietako 72,25 larreak izan dira eta ez da landarerik ezta bertzelako kalte aipagarriegirik ere izan. Bere kabuz sortutako arboldi berri batzuk ere erre dira, 12 guztira, 24,4 Hektareako eremuan.
Laburbilduz, aurtengo denboraldiak bi alderdi izan dituela aipatu du Elizetxek, «bat arras positiboa, nekazarien partehartzea hobetu delako eta EPRIF eta suhiltzaileek egindako lana eta lanerako eskaini duten borondatea izugarria izan delako. 400,34 Hektarea baimenarekin erre izana datu historikoa da». Alderdi negatiboari dagokionez, zera aipatu du: «oraindik badago jendea baimenik gabe erretzen segitzen duena, iaz baino hiru aldiz sute gehiago erretako partzelei dagokienez, eta lau aldiz gehiago erretako arboldia izan delako».