Munduko buruz buruko pala txapelketaren finaleko atarian gelditu zen Xabi Ibargarai erratzuarra, baina podiumeko azken koxkara igotzea lortu zuen apirilaren 14an Bilboko Bizkaia pilotalekuan hirugarren posturako lehian Urkijori doi-doi irabazita. Erratzuko atzelariak bortz set edo joko behar izan zituen Urkijo menpean hartzeko. Lehendabizikoan Urkijo nagusitu zen, 10-7. Bigarrena eta hirugarrena erratzuarrak irabazi zituen, 9-10 eta 7-10, baina laugarrena berriz ere Urkijoren alde joan zen, 10-6. Beraz, azken set erabakigarrira ailegatu ziren, eta bederatzina berdindu ondotik, hondarreko tantua Xabi Ibargaraik lortu zuen. 54 minutu iraun zuen hirugarren posturako lehiak.
Munduko txapeldun berria, bertzalde, Pablo Fusto da.