Apirilaren 16ko goizean Foru Poliziak Eneko Etxandi arraioztarra atxilotu zuen, baina arratsalderako epailearen aitzinean deklaratu ondotik karguekin libre atera zen. Joan den urteko Iruñeko sanferminetan udaltzainekin izandako kalapitan «aginteari eraso eta lesioak eragin izanaz» akusatu dute Etxandi gaztea.
Aipatutako egunean, 11:00 aldean atxilotu zuten Arizkunen eta handik Elizondoko Foru Poliziaren komisariara eraman zuten eta ondotik, Iruñeko udaltzainen komisariara. 17:30 arte eduki zuten han, epailaren aitzinetik eraman bitarte. Epaileak deklarazioa hartu ondotik, 19:00etako kalean zen karguekin eta epaiketaren zain. Gertatutako guztiaren inguruan solasteko, atxilotu zuten egun berean batzarre informatiboa egin zen Elizondon eta 35 herritar inguruk parte hartu zuten. Enekoren atxiloketa eta errepresioa salatuz pankarta ere paratu zuten batzarre egunean.