Sute kontrolatuetan puntu beltza izatetik, eredugarri izatera pasatu da Baztan. Hala dio batek baino gehiagok. Aurtengo neguko suteen kontrako kanpaina ere arras ongi joan da Baztanen eta datu historikoak lortu dituzte. Xehetasun gehiago Aitor Bazterrikak eman dizkigu, 2000az geroztik Baztango udaleko basozaina denak. Iaz Espainiako Ministerioak EPRIF Baso Suteen Aurkako Taldeari emandako sariaren bidetik, aurten Urrezko Intsignia eman diote Bazterrikari, suteen kontra herritarrak sentsibilizatzeko egindako lanagatik.
Urte hauetan zer aldatu da mendiko suteen aferan Baztanen?
Urte andana baditugu lanean, baina emaitza onak azkeneko bi urteotan lortu ditugu. Gan den urtean, Baztanen kuartelka bilerak egitea pentsatu genuen. Bilera horietan jendeak gauzak aitzinera ateratzeko eta gauzak behar bezala egiteko interes haundia zuela ikusi genuen. Laguntza eskainiz kanpaina bat egin genuen eta denborak ere aunitz lagundu zigun eta erreketa aunitz egin ziren. Jendea arras kontent gelditu zen. Aurten helburua suteetara jende gehiago etortzea zen eta helburu hori erraz bete dugu. Eguraldiak ere lagundu digu eta konpromiso gehiegi bagenituen ere, ia denak bete ditugu.
Zer moduz joan da aurtengo kanpaina?
Baztanen, EPRIF taldearen eta suhiltzaileen laguntzarekin, 22 egunez 32 erreketetan parte hartu dugu eta guztira 276,4 hektarea erre ditugu. Erreketa hauek bigarren eta hirugarren mailakoak izan ohi dira, lehen mailakoak errezagoak dira eta nekazariek beraiek egiteko uzten dira. Hortaz aparte, nekazariek beraien kabuz, 37 erreketa gehiago egin dituzte, guztira 132 hektarea errez. Datu historikoak dira, 400 hektarea pasata erre dira eta denak baimenduta. Baina bertzetik, iaz baimendu gabeko lau sute bakarrik izan ziren eta aurten hogei bat izan dira, nahiz eta erre dena ez den interes haundikoa izan, gehiena larrea izan baita. Beraz, aurtengo kanpainatik bi afera aipa daitezke: batetik, nekazarien partehartzea haundiagoa izan dela eta erreketa kontrolatu gehiago egin direla. Eta bertzetik, baimenik gabeko erreketak egin direla. Hor finkatu behar dugu heldu den urteko lana. Aurten ez da inor harrapatu erretzen, baina heldu den urtean kontrol gehiago izanen dira. Baimenik gabe erretzen duenak zigorra izanen du. Su eman eta ihes egiten duenak badaki suak erre nahi dena eta nahi ez dena erreko duela.
Jendea kontzientziatua dago suteak nola egin behar diren?
Kontzientziatzen ari da, baina Udalak, EPRIF taldeak eta suhiltzaileek laguntza ematen dutelako. Erreketak nola egin behar diren erakusten ere ari gara. Jendeak erreketak egiten badakiela uste duen arren, behar bezala erretzen gutik dakite. Guk maldan beheiti erretzen dugu eta jendeak alderantziz erretzeko ohitura du. Goitik beheiti erretzeko denbora gehiago behar da baina emaitzak arras hobeak dira.
Zer egin behar da kontrolatutako sutea egiteko?
Lehendabiziko baimena eskatu behar da. Urte hasieran eskaerak hartzen ditugu eta basogintza eta nekazaritza aldetik, hektarea aunitz dituztenak kontuan hartuz, arrisku maila ikusiz, landaketak badauden edo etxebizitzak arriskuan dauden ikusiz, zerrenda bat egiten dugu. Zerrenda hori kontuan hartuz antolatzen dira erreketak, arriskutsuenetik arrisku ttikiena duenera. Eguraldiak laguntzen duen guztia egiten da kanpaina akitu arte. Gisa berean, erreketan guttienez bortz nekazarik egon behar dute, udaletxetik batek edo bik, EPRIFekoak erreketaren arabera (lan handiarekin gehiago) eta lauzpabortz suhiltzaile. Nafarroako Gobernutik ematen dute baimena, suhiltzaileek egun horretan erre daitekeen ala ez erraten dute eta sutea hasi aitzinetik zein paraje erre behar den jakinarazi behar da eta erreketa akitzean ere abisua eman behar da.
Zer gehituko zenuke?
Inguruko bailarek Baztan eredu izan beharko lukete eta lanean hasi, mendia denona delako. Gure esperientzaren berri emateko prest gaude.
2012KO KANPAINA
«EPRIF taldearen eta suhiltzaileen laguntzarekin, 22 egunez 32 erreketetan parte hartu dugu eta guztira 276,4 hektarea erre ditugu. Hortaz aparte, nekazariek beraien kabuz, 37 erreketa gehiago egin dituzte, guztira 132 hektarea errez. Datu historikoak dira, 400 hektarea pasata erre dira eta denak baimenduta. Baina bertzetik, iaz baimendu gabeko lau sute bakarrik izan ziren eta aurten, hogei bat izan dira»