Almandozko Arritxuri harrobia haunditu eginen dute. Hala onartu zuen apirilaren 2ko bileran Batzar Nagusiak, aldeko 24 botorekin, kontrako laurekin eta bi abstentziorekin. Eta haunditzearen aldeko botoak nagusitu ziren apirilaren 1ean Almandozen berean egin zen batzarrean ere. Erroldatuak dauden 188 herritarretatik 150ek eman zuten botoa eta 87k harrobia haunditzearen alde egin zuten, 62 kontra agertu ziren eta batek zurian eman zuen botoa. 6,7 hektareako eremua haundituko da.
Bere garaian Batzar Nagusian batzorde berezia osatu zen ustiapen honek herritarrengan zein ondorio izan zitzakeen azaltzeko. Haunditzeko erabakia hartu aitzinetik kaltetuekin eta enpresako arduradunekin bildu dira batzordekoak, eta enpresari hainbat baldintza paratu zaizkio: harrobiko zabor piletarako lur okupazio berria eskatu beharko du eta urak bideratzeko lubeta egin. Harrobiko ur zikinendako dekantazio baltsa ere egin beharko du, eta segurtasun eremuan dauden giltxaurrondoengatik balorazioa egin eta jabeei kalteordaina eman beharko die. Gisa berean, Abreiko bidea garbitu beharko du pistaren lehengo zabalera berreskuratuz. Proposamenak batzarkide guztien aldeko bozka izan zuen. Sei hilabete izanen du enpresak pista garbitzeko eta gainerako lanetarako, berriz, hiru hilabete.
Harrobia haunditzeaz gain, Batzar Nagusiak ekialdeko bidea aukeratu zuen apirilaren 2ko botazioan, Abreiko bidea, hain zuzen. 24 aldeko boto jaso zituen bide honek eta sei abstentzio. Almandoztarrek ere batzarrean bide honen alde egin zuten.
Protesta
Apirilaren 2ko Batzar nagusian, Magnaren Kintoko herri-lurren desafekzio eskaerari Batzar Nagusiak bi aldiz emandako ezetza bertze behin berrestea erabaki zuten batzarkideek. Aldeko 22 boto izan ziren eta 7 aurka (UPN, Ezkerra eta Elbeteko alkatea).
Kintoko desafekzioaren aferan udal ordezkari batzuen eta aldi berean Batzar Nagusietako kide diren batzuen jarreraren aitzinean, herrietako alkate eta juntero batzuk protesta gisa aretotik kanpora atera ziren. Garbiñe Elizegi Batzar Nagusietako presidenteak, bortz minutuko etena egitea erabaki zuen eta protesta ekimenaren ondotik segitu zuen bilkurak. Batzar Nagusiaren erabakia errespetatzeko eskatu zuten.
DATUA
24 ALDEKO BOTO jaso zituen harrobia haunditzeko proiektuak apirilaren 2ko Batzar Nagusian.