«UPNk egiten duen politika komunikabideetan titularrak bilatzea bertzerik ez da. Lehenik bilgarria prestatu eta ondotik bete. Poltroietaik, zesantietatik eta administrazio kontseiluetako dietetatik bizi direnen ohiko jokatzen modua». Halaxe erantzun diete Udal Gobernuko taldeek, Bilduk eta Ezkerrak, ohar bidez UPNk prentsaurrekoan errandakoei.
UPNk Udalaren futzionamenduan «etengabeko txapuza» salatu zuen, eta horrekin «alarma sortzea» egotzi diote Bilduk eta Ezkerrak, «nahiz eta baztandarrek orain artio ikusi dutena udaletxe ireki, parte hartzailea, hurbila eta eraginkorra izan den». Gaineratu dutenez, «titularraren ondotik, estalkia betetzeko, epealdi luze bateko gisa eta garrantzi desberdineko gertakarien zerrenda; helburua: aitzinetik egindako irudi faltsu bat hedatzea».
Udalbatzarren aretoan egindako prentsa agerraldiaren gaiaz ere ari da Udal Gobernua oharrean: «udaletxe ireki batean inongo garrantzirik ez duen afera. Alta, UPNk udalbatzarrean erregearen, hau da, Francoren oinordekoaren, diru publikoaren kontura bizi den horren argazkia egoteko egiten duen eginahala, UPNk Udalari eta baztandarrei dien errespetua zein den argi erakusten du».
Udal idazkari posturako hizkuntz eskakizunen aferaz ere badihardu: «joan den ekaineko gaia, dagoeneko solastatua, argitua eta konpondua dagoen gaia, hain zuzen, nahiz eta akaso ez diren konturatu», dela oroitaraztearekin batera. Horrekin batean, «Udalak oharkabe euskara hutsez igorritako jakinarazpen baten kasua» ere ageri da oharrean: «zeinak UPNrendako euskara errusiaren gisakoa dela jakiteko balio izan digun». UPNren ikusmolde «kolonialista» horrek euskaldunoi, hau da, Baztango gehiegoari «zenbaterainoko ezinikusia digun erakusten digu», erran dute Bilduk eta Ezkerrak, eta nabarmendu dute «UPNkoek euskaraz ez jakiteagatik Udalak udalbatzarretarako eta batzordeetarako itzultzaile lanetarako duen gastu erantsia».
Batzorde informatiboen inguruan, «aldi jakin batzuetan udalbatzarraren aitzinetik egitea pasa izan zaigula», onartu dute Bilduk eta Ezkerrak: «ezbairik gabe, hori gure akatsa da eta gure asmoa hori zuzentzea eta udal jarduera hobetzea da». Udal batzordeak murriztu direnaren inguruan, ordea, «gaia eztabaidan dagoela eta Nafarroako Administrazio Epaitegiak argitu beharko duela», adierazi dute. Bilduk eta Ezkerrak zera argitu dtue: «eztabaida politikoa guttietsi gabe dietak aurreztu ditugu. Orain artio, aldika puntu bakarra zuten edo lau minutu bertzerik irauten ez zuten batzorde informatiboetarat joateagatik zinegotzi bakoitzak 100 euro kobratzen zituen. Gure proposamena batzordeetan guttieneko lan-zama segurtatzeko izan da, horrela 100 euroko ordainketa hori errentabilizatzeko». Hirigintzako gaiak batzorde zabal horietan ukitzen direla azaldu dute Bilduk eta Ezkerrak eta Aroztegia eta Elizondoko 1. Banaketa Areari buruzko informazio zehatza nahi badute prentsan beharrean bertan galdegin beharko dutela adierazi diote UPNri. Momentu honetan dozena bat batzorde ireki martxan daudela ere azpimarratu nahi izan dute eta horietan ehun herritar inguruk parte hartzen dutela. Bide batez, batzorde horietan nahi duten herritarrek parte hartzen ahal dutela oroitarazi dute.
Akten kontuan, «gure borondatea gisakorik berriro ez errepikatzea da eta, horretarako, egin beharrekoak eginen ditugu», diote Bilduk eta Ezkerrak. Nolanahi ere, gogoratu nahi izan dute, «lehendabiziko aldia dela Baztango Udala elebiz ari dela lanean eta horrek udal teknikari batzuendako lan bikoitza suposatzen duela. Nafarroako Gobernuari aurrekontuetan aurkeztutako emendakin baten bidez itzulpen lanetarako laguntza eskatu diogu, baina ukatu egin digu; horrek Udalaren jardun arrunta zailtzen du».
Egindako «akatsak guregain hartzen ditugula» adierazi dute, baina Bildu eta Ezkerraren irudiko, «bistan da UPNk ‘etengabeko txapuza’ dela errateko erabili dituen argudioek ez dutela errealitatearekin bat egiten. Horrek erakusten duen bakarra UPNk herritarren alde lanean ari den udaletxe herrikoi eta ireki honen aurka duen jarrera suntsikor eta erasokorra da». Aski modu «axolagabean alarma faltsua sortzen saiatu izana»leporatu diote UPNri: «aise gehiago eta hobe eginen lukete titular handi-mandien partez, Gobernuarekin duten hari zuzena Baztanen alde erabiliko balute».