Udalaren funtzionamenduan «behin eta berriz ilegaltasunean» dabilela Bildu salatu du UPNk. «Sistematikoki prozedura ez da betetzen, batzordeak egin gabe batzarrak deitzen dituzte, dokumentazioa epez kanpo eta geronek eskatzen dugulako bakarrik ematen digute eta behin eta berriz eskatu dugu plenoak bi hizkuntzetan egitea», dio UPNk, «Udalaren funtzionamendua txapuza bat dela» gaineratuz. Batzorde informatiborik ez dagoela ere badio eta egoera aldatzen ez denez, Nafarroako Auzitegi Administratiboan errekurtsoa sartu omen du.
«Udalaren lan erritmoa eta lana kudeatzeko gaitasuna» murriztu direla ere adierazi du etxez-etxe banatu duen boletinean. Ekainetik abendura aztertu diren gaiak zenbatu ditu, eta kalkulatu duenez, 2008ko bigarren seihilekoan 134 puntu landu ziren, eta 2011n 54.
Aurrekontuaren harira, «sinestezina, ulertezina, ausartegia, xahutzailea, arduragabea eta ez eraginkorra» hitzak erabili ditu UPNk: «Nafarroako Gobernuari baliabideak murriztea egotzi ondotik, aurrekontua iazkoa baino 400.000 euro haundiagoa dela ikusita sorpresa hartu dugu. Gobernuak %70eko laguntza emanen lukeen eta Hirurteko Planean zeuden aurreikusitako jarduerak Bilduk eta Ezkerrak alde batera utzi dituzte».
Estatu mailako azienden lehiaketarako partida kendu izana ere kritikatu du: «40.000 euroko gastua da eta babesle eta dirulaguntzekin 20.000 eurokoa». Abeltzainei buruz solasean «ahoa betetzen» dutela leporatu die, «baina errealitatean ez dira beraien lehentasunak».
Magnak Zilbetin egin nahi duen harrobi proiekturako, herrilurrak uzteko Udalari egindako eskarian «Bildu bakarrik gelditu» dela ere badio UPNk eta proiektu honekin «Baztan, instituzioak eta joko demokratikoa irabaziz atera direla».
Udal langile guztiei EGA eskatzearekin ere ez da konforme agertu, «adin gehiago eta maila akademiko baxuagoa dutenendako eta euskaldun zaharrendako kaltegarriagoa izan daitekeelakoan». Dioenez, «UPNk proposamen alternatiboa aurkeztu zuen, euskararen jakintza maila lanpostura egokituko lukeena».
Bildu eta Ezkerra
Nafarroako Gobernuak Baztango piriniar behien feria egiteko laguntzak ia hutserat moztu dituela argitu dute Bilduk eta Ezkerrak eta aldi berean, UPNk honen inguruan erran dituenak gezurtatu nahi izan dituzte.
Iaz Elizondon Aspinarekin batean egin zen piriniar behien feriak denetara 48.000 euroko gastua izan zuen. Baina Bilduk azaldu duenez, «kontuak oraino zuritu gabe daude, Aspinak eta babesle gehienek beren partearen handiskoena ordaindu badute ere (3.700 euro falta dira), Gobernuak oraino ez du bere zatia ordaindu, 15.250 euro, hain zuzen». Are gehiago, Amaiurko abuztuko ardien feriako 3.675 euroak ere ez omen ditu ordaindu eta momentuz, diru hori Udalak jarri du, «bertze behar batzuk ase gabe utziz; adibidez hiltegia». Hala ere, «Udalak esfortzu bat eginez 17.000 euroko partida bideratu du hiltegia moldatzeko», jakinarazi dute.
Gobernuak 2012ko aurrekontuetan feriak egiteko diru kopurua iazko 50.000 euroetatik aurtengo 25.000etarat jautsi duela ere aipatu dute Bilduk eta Ezkerrak. Eta murrizketak direla eta, 25.000 euro horiek iaz agindutako dirulaguntzak ordaintzeko erabiliko dituzte: piriniar behien feria, Amaiurko ardiena, Elizondoko feria, Uharte Arakilgoa… «Bistan denez, 25.000 eurorekin ez da aski, eta modu horretan, herritarrek jakin behar dute iazko Elizondoko ferietako azienden merkaturako Gobernuak hitz eman zituen 6.000 euroak ez dituela ordainduko, hortaz, Elizondoko herriak kostu hori beregain hartu beharko du».
Egoeraren aitzinean, feriei buruz solastu da Udala Abeltzaintza Saileko arduradunekin, baina «dirulaguntzak ez segurtatzeaz gain, guk aurten feriak antolatzekotan, aurtengo laguntzen ordainketa 2013an eginen dutela adierazi digute».
Udalak feriarik ez duela antolatu nahi eta nekazarien aldeko solasekin ahoa bete baina ez duela deus egiten erranez, UPNk egindako adierazpenei ere erantzun diete, gezurretan aritzea leporatuz. «Feriak ez egitekotan, Gobernua da ez egitearen ardura duena eta Gobernua da urte hauetan nekazariek jasan dituzten neurrien arduraduna, tartean Begoña Sanzberro UPNren zinegotzia eta aitzineko legealdian nekazaritza eta abeltzaintza kontseilaria». Kontseilaria zela nekazaritza eta abeltzaintzarako laguntzak %30 murriztu direla oroitarazi dute Bilduk eta Ezkerrak, «berriz ere Baztango nekazarien guztiz kontrakoa den eredua bultzatuz eta, hain izan dira zabarrak, Europatik nekazaritza iraunkorrerako eta neurri agroanbientaletarako laguntzak ez dituztela politika horiek egiteko erabili ere egin, eta hori aski kezkagarria da, laguntza horiek Baztango nekazariak zuzenean ukitzen dituztelako».
Gobernuaren jokaera ikusita, Udalarendako «ezinezkoa da» 48.000 euroko aurrekontua duen feria antolatzea. «Horrek ez du erran nahi ez garenik ari bertze aukerak aztertzen, gure borondatea lehiaketa urtero antolatzea da».