Baztango Udalak harrera ofiziala eta omenaldia eskaini zizkion berriki Eskozian jokatutako Munduko txapelketatik dominak ekarri dituen Amaiurko sokatira taldeari.
Mikel Ortega, Iñigo Iturralde, Maria Isabel Olabe eta Mari Carmen Iribarren zinegotziek zoriondu egin zituzten taldekideak eta Balleko ikur historikoa duen oroigarria eman zioten taldeari. Ondotik, Manex Meokik Aurreskua dantzatu zien tiralariei, Iñigo Morenok txistua jotzen zuen bitartean.
Otsailaren 23 eta 24 bitartean egin zen Perthen (Eskozia) kluben arteko munduko sokatira txapelketa. Aipatutako txapelketa horretan Amaiur Kirol Taldea hirugarren postuan gelditu da 560 kiloko kategorian, brontzezko domina lortuz. Gainera, txapelketa mistoan ere hirugarren izan zen Amaiur, Sakanako neskekin batera.