Otsailaren 23an, ortzegunean hasi da goma gaineko Munduko Sokatira Txapelketa Perth-en (Eskozia). Kluben arteko txapelketako lehen jardunaldia jokatu da. Gizonezkoen 560 kiloko txapelketan Abadiñok zilarrezko domina kolkoratu du, finalean Country Club (Ipar Irlanda) taldearen aurka bi tiraldiak galdu ondoren. Aitzinetik, Amaiurrek hirugarren posturako lehia jokatu du Txina-Taiperen aurka, eta aise irabazi dizkio bi tiraldiak. Honela, Amaiurrek brontzezko domina lortu du.
Gizonezkoen 560 kilokoan 21 talde aritu dira sokan goizeko 11:00etan hasita eta arratsaldeko 18:15ean amaitu da. Hogeita bat talde horien artean Abadiño A eta Abadiño B (Abadiño, Bizkaia), Amaiur (Nafarroa Garaia), Berriozar (Nafarroa Garaia), Ñapurrak (Ezpeleta, Lapurdi) eta Sokarri (Arrigorriaga (Bizkaia) aritu dira lanean. Horietatik, Abadiño A-k eta Amaiurrek lortu dute finalerdietarako sailkatzea. Atzerritarrei dagokienez, China Taipei A, Clonmany B, Cockhill, Country Club, Richill, eta St Pats. Cockhill hirugarren sailkatu zen orain dela bi urte eta Richill laugarren.
2012ko Gizonezkoen 560 kiloko sailkapena:
1. Country Club (Ipar Irlanda)
2. Abadiño A (Abadiño, Bizkaia; Euskal Herria)
3. Amaiur (Amaiur, Nafarroa Garaia, Euskal Herria)
4. Txina-Taipei (Txina-Taipei)
Emakumezkoen 540 kiloko txapelketan Badaiotzek (Gasteiz, Araba) zilarrezko domina kolkoratu du. Espero zen bezala, Txina-Taipei izan da talderik indartsuena, eta talde horrek irabazi die gasteiztarrei finala, bi tiraldiak irabazita. Aurrez, Sakanak hirugarren posturako lehia izan du Stans Oberdorf (Suitza) taldearen aurka, eta brontzezko domina kolkoratu du.
Emakumezkoen 450 kiloko sailkapena:
1. Txina-Taipei (Txina-Taipei)
2. Badaiotz (Gasteiz, Araba)
3. Sakana (Arbizu, Nafarroa Garaia)
4. Stans Oberdorf (Suitza)
Ortziralean 600 kilokoan
Otsailaren 24ean, ortziralean, 600 kiloko txapelketan ehiatuko da Amaiur, Abadiño A, Abadiño B, Berriozar, Ibarra, Ñapurrak eta Sokarri euskal taldeekin eta bertze 14 talderekin batera. Emakumezkoak 500 kilokoan ariko dira.