LAB sindikatuak Nafar-Mendi supermerkatuan «gertatzen ari diren gertaera larri batzuen berri» eman du prentsa-ohar bidez. Merkataritza gune honen kontra deus ez duela eta kontrako kanpainarik ez duela egin nahi garbi utzi du LABek, baina 2010eko ekainean 50 langilerekin zabaldu zenetik gaur egunera arte «langileen kaleratzeak, irainak eta tratu txarra bere zentzurik zabalenean eguneroko ogia» direla dio sindikatuak eta enpresako nagusia jo du erantzule.
Kaleratzeei dagokienez, urte eta erdian, «20-25 bat langile kaleratu dira, kaleratze indibidual batekin, gehienak modu hagitz txarrean, inolako erregulazio espediente edota antzeko neurririk gabe», jakinarazi du.
LABen salaketa urrutirago doa: «langile batzuei antsietateak eta antzeko patologiak aurkitu dizkiete medikuek, denak lanari lotuak daudenak eta bertan jasaten duten jazarpen laborala dela medio». Gaur egun, jazarpen hori tarteko, «badaude langileak baja egoeran daudenak, depresioa eta antzeko patologiak diagnostikatu zaizkie», dio LABek. Horrez gain, gaineratu du, «langileen aurkako mehatxu, irain eta eraso fisikoengatik nagusiaren kontra hainbat salaketa paratu direla bai Foru Poliziaren komisarian, baita lan auzitegian ere».
Honelako gertaerak Nafar-Mendi supermerkatutik eta gertatzen diren toki orotik desagertarazteko bere esku dagoen guztia eginen duela aipatu du LABek, «ez dugulako utziko inongo nagusiak langileekiko horrelako jarrerarik izatea».