Amaiurren, otsailaren 17an eta 18an izanen dira inauteriak. Otsailaren 17an, 09:30 aldera, gazteek gosaria eginen dute elkartean eta ondotik, mozorrotuta, eskolara bisita eginen dute. Eguna baserrietan eskean pasako dute eta gauean afaria eginen dute elkartean. Dantzaldia ere izanen da. Biharamunean, gosaldu ondotik, herrian barna eskean ibiliko dira eta gauean afaria eta dantzaldia izanen dira elkartean.
Erratzun, otsailaren 15eko oilar dantzaren ondotik, hilaren 19an egun guztian etxez-etxe puxkak biltzen ariko dira eta gauean afaria eginen da. Otsailaren 20an ere puxkak biltzen ibiliko dira eta gauean afaria izanen da. Otsailaren 21ean, azkenik, dama, zanbonba eta mozorro desfilea eginen da eta gauean afaria.
Arizkunen, otsailaren 19an, gazteek eginen duten gosariarekin hasiko dira inauteriak. Egun guztian eskean ibiliko dira etxeetan eta 20:00etan musika izanen da frontoian. Ondotik afaria eta dantzaldia. Otsailaren 20an, goizez gosaldu ondotik, eskean ibiliko dira. Ilunabar aldera musika izanen da frontoian, eta gauean afaria eta dantzaldia. Otsailaren 21ean, berriz, gosaldutakoan, sagar dantzaren txanda izanen da. Ondotik, hartza menditik jeitsiko da eta herrian barna itzulia eginen du karrozekin.
Gartzainen, otsailaren 28an, baserriz-baserri ibiliko dira eskean eta biharamunean, falta diren auzoetan eta herrian ariko dira eskean. Gauean afaria eta besta izanen dira.
Elizondon, Orakunderen ondotik, ortziral eta larunbatarekin ospatuko dira inauteriak, otsailak 17 eta 18. Xehetasunak aldizkariko gehigarrian.
Iruritan, lehendabiziko egunean, etxez-etxe eskean emanen dute egun osoa eta biharamunean, goizez etxeetan ibili ondotik, arratsaldean herrian barna mozorroturik aterako dira herritarrak. Gauean afaria izanen da.
Lekarozen ere otsailaren 17an eta 18an ospatuko dira inauteriak. Ortziralean, auzoetan eskean ibiliko dira eta gauean afaria eta dantzaldia izanen dira sagardotegian. Biharamunean, herrian ibiliko dira eskean. Ondotik bazkaria eginen da Herriko Ostatuan eta afaria elkartean. Dantzaldia ere izanen da.
Egun horietan ospatuko dituzte Almandozen ere inauteriak: otsailaren 17an eta 18an. Ortziralean afaria eginen dute Futbolin deitzen den tokian eta larunbatean baserriz-baserri eskean ibili ondotik, ilunabarrean afaria eginen da.