Inauterietako aroan bete-betean murgilduak gaude Baztanen, eta hasia da mozorro besta. Aniz izan zen inauteriak ospatzen lehendabizikoa, eta Berroetak hartu zuen lekukoa ondotik. Arraioz eta Oronoz-Mugairiren txanda etorri zen gero. Otsailean sartuta, Erratzun Gizakunde ospatu zuten, eta orain gainerako herrietan izanen dira inauteriak.
Azpilkuetan, asteburu honetan izanen dute inauterien txanda. Ortziralean, otsailak 10, gosaldu ondotik, eskean ibiliko dira Zuaztoi, Urrasun eta Arribiltoa auzoetan eta gauean gazte afaria eginen da. Larunbatean, gosaldu eta Apaioa auzoan eta herrian eskean ibiliko dira eta gauean afaria eginen da.
Elbeten, larunbat honetan, otsailak 11, eginen dituzte inauteriak. Goizean indarrak hartzeko gosaria eginen dute eta ondotik, etxez-etxe eskean ibiliko dira gazteak. Gauean herritar guztiendako afaria izanen da Posadan akordeoi doinuek lagunduta.
Zigan ere asteburu honetan izanen dituzte inauteriak. Ortzirala eta larunbata etxez-etxe eskean eta otorduak eginez besta giroan pasako dituzte.
Orakunde
Orakunde izaten da inauterietako bertze hitzordua. Otsailaren 16an izanen da herri gehienetan eta neska-mutikoak oilarraren gibeletik ibiliko dira, egurrezko ezpatekin eta begiak estaliak dituztela. Anizen eta Berroetan, aldiz, otsailaren 18an izanen dute Orakunde.