Urteak dira Erratzuko kultur elkartea sortu zela. Betidanik izan duen erronketako bat, ekitaldiak dohain egin daitezkeela erakustea izan da.
Berriki 2011ko balorazioa aurkeztu du, martxan paratutako ekimenen berri emanez: kantu zaharren tailerra (astelehenetan 20 lagun biltzen ditu), dantza tailerra (ortziral eta larunbatetan 25 lagun biltzen ditu), musika banda (hilabetean behin entsegua)... Horiek denak 2012an ere segituko dutela adierazi dute kultur elkartetik. Ez dira, ordea, antolatutako jarduera bakarrak izan: bertso poteoa eta afaria, bi diapositiba emanaldi (70 lagun bildu ziren), Mendebaldeko Saharako brigadak janaria eraman zuen, Mumia free dokumentala, Eider Rodriguez idazlearen solasaldia, emaztekien frontenis txapelketa, Karakola segi hola saioaren besta...
Otsailean, berriz, Gizakunde –otsailak 4–, oilar dantza –otsailak 15– eta inauteriak izanen dira –otsailak 19, 20 eta 21–. Eta «dena musutruk» antolatu dutela azaldu dute elkartetik: «auzolanaren planteamenduari segituz, kultur jarduera herritar, partehartzaile, autogestionatu eta doakoak egitea posiblea dela azpimarratuz; elkarlanaren bitartez jendartearen kultur asetze maila betetzea posible dela erakutsiz». Aurten ere bide beretik segituko dute.