Erratzuko Emaztekien Frontenis Txapelketari lekukoa hartuz, orain bailara osokoa hasiko da. Larunbat honetan, ilbeltzak 28, Baztango Emakumezkoen Frontenis Txapelketari ekinen zaio. Guztira 30 bikotek eman dute izena eta partidak Amaiur, Erratzu, Arizkun eta Oronozko pilotalekuetan jostatuko dira. Finalerdiak eta finala, berriz, Iruritako pilotalekuan izanen da.
Erratzuko txapelketa
Gan den ilbeltzaren 14an, Etxelebertzeko frontoian, Erratzuko Emaztekien Frontenis Txapelketako hirugarren eta laugarren postuko lehia eta finala jokatu ziren. Harmailetan jende andana bildu zen herriko emaztekiak animatzeko eta olatua ere egin zen. Hirugarren eta laugarren posturako lehian, Roxa eta Agurtzanek 22-30 galdu zuten Oihana eta Marijoxeren kontra. Eta finalean, Joxune eta Amaiak 30-15 irabazi zioten Manttoni eta Ainhoari (Idoia). Partiden ondotik, sari banaketak egin eta Kastonean afari goxo batekin akitutzat eman zuten txapelketa.