Frantziako Poliziak Ernesto Prat Urzainki atzeman du urtarrilaren 25ean, asteazken goizeko 09:30ak aldera Urruñan. Berriozarkoa da Ernesto (1978) eta, Ateak Ireki webaren arabera, 2008tik Lapurdin bizi da, Guardia Zibilak Nafarroan independentisten kontra egindako operaziotik ihes egin ondotik. Europa Press berri-agentziak jakinarazi duenez, Espainiako Auzitegi Nazionalaren euroagindu baten bidez atxilotu dute.
Ihes egin aitzinetik, Ernesto Prat Elizondon bizi zen eta horregatik, asteazken arratsaldeko 20:00etan batzar informatiboa eginen da Elizondoko plazan. Urruñan ere kontzentrazioa deitua dago.