Magna enpresak Zilbetin egin gogo duen harrobiak zer erran aunitz sortu du eta sortuko du. Urtarrilaren 2ko Batzar Orokorrean Kintoako 1.600 metro koadro herrilurren desjabetzeaz aritu ziren berriz ere, inguru horretan tunela egiteko asmoa baitu Magnak, kamioiak Zilbetitik ez pasatzeko. 17 batzarkide (Bilduko 5 zinegotziak eta 12 herrietako alkate eta kuarteleko ordezkari) desjabetzearen kontra agertu ziren berriz ere eta bertze 13 (UPNko 5 zinegotzi, Baztango Ezkerrako 2 eta 6 alkate eta kuarteleko ordezkari) desjabetzearen alde. Abstentzio bat ere izan zen. NaBaiko zinegotzia ez zen batzarrean izan, bai ordea Magnako 8 langile baztandarrak eta proiektuaren kontrako taldeetako partaideak ere.
Erdiz Bizirik kontra
«Magnak Zilbetiko Antzerin egin nahi duen harrobia Erdizen egin nahi duenarekin estuki lotua dago. Alde batetik, Antzerikoaren memorian, egitasmo hau Erdizen muturra berriz sartu artekoa bertzerik ez dela izanen diotelako. Bertzetik, Antzeri, Erdizen gisa, Aldude Mendi izeneko Zainketa Bereziko Eremuan dagoelako». Halaxe adierazi du Erdiz Bizirik plataformak. Antzerikoaren tramitazio prozedura, herri-lurren desjabetzea eta Baztango zenbait alderdiren jarrera «aski kontu larriak» direla uste du.
Antzeriko proiektua zela eta, Erdiz Bizirik-ek Zilbetiko Aldude Mendi Koordinakundearekin, Udalez Gaindiko Plan Sektorialaren aurkako alegazioak bildu zituen herritarren artean. Gobernuak baztertu egin zituen eta gaia administrazioarekiko auzi epaitegian dago.
Bitartean, Antzeriko proiektua egiteko eta materiala garraiatzeko Magnak Zilbetin tunela egiteko pausuak eman dituela salatu du Erdiz Bizirik-ek. Tunel horretarako Kintoko herri-lurretan 1.600 metro koadroko eremua desafektatu nahi zuten, baina Udalak Batzar Nagusian erabakitakoarekin, Kintoko Mankomunitatean baimena ematearen aurka egin zuen. Magnak, bere aldetik, Kintoko lur horiek desjabetzeko eskatu omen dio Gobernuari, eta hori «aurrekari larritzat» jo dute Erdiz Bizirik-en. «Herriko erakundeei hitza kendu bidenabar, herri-lurrak desjabetu nahi dituzte. Eta tokiko erakundeen eskumenak eta herri-lurrak defendatu beharrean UPN, PSN eta Ezkerra proiektuaren alde agertu direla» kritikatu du taldeak. Aipatzekoa da zenbait herrietako batzarretan desafekzioaren gaia aztertu dutela. Almandoz, Ziga, Berroeta, Azpilkueta eta Oronoz-Mugairi desjabetzearen alde agertu dira eta Anizen kontra.
Erdiz Bizirik Plataformak gaineratu duenez, «komunalak kendu eta enpresa pribatu baten eskuetan utzi nahi dituzte, bazter guztiak xehatzeko». Erdiz 91 nekazarik erabiltzen dutela ere azaldu du: «urtero 406 behik, 229 zaldi-behorrek eta 611 ardik alatzen dute bertan». Hain zuzen, Komunalen defentsan: ez PSISIk ezta desjabetzarik ere; Erdiz Bizirik! lelopean elkarretaratzea egin zen abenduaren 24rako Elizondon.
NaBai ere Magnaren egitasmoaren alde
NaBai taldeak ohar bidez jakinarazi du, bere garaian egitasmoaren alde agertu zela eta orain ere Magnak Zilbetin egin nahi duen egitasmoa babesten duela: «Zilbetiko kontzejuko eta Erro eta Esteribarko bizilagun eta instituzioendako interes orokorrekoa delako», adierazi du NaBaik, eta gaineratu du «gure ballerako eta hemen lan bila dabiltzanendako onuragarria delako».
NaBairen erranetan, «Magnaren meategi proiektuak Zilbetiko eta Erroko bizilagunen eta Esteribarko udalbatzaren (kontrako botorik gabe) babes osoa dauka, baita enpresa horretan ari diren Baztango langileena ere».
NaBai bezalaxe, UPN eta udal gobernu taldean Bildurekin batera lanean ari den Baztango Ezkerra ere proiektuaren alde agertu dira.