Abenduaren 17an egindako batzarrean, Elizondoko bizilagunak Txokotoko presa eta zubia berdin mantentzearen alde agertu ziren. Garai bateko errotaren presa eta Txokoto auzoa eta herrigunea lotzen dituen Minuartea edo Antxitoneako zubia, moldaketa ttiki batzuk gorabehera, eraiki zirenetik berdin mantendu dira eta halaxe segitzea eskatu zuten elizondarrek.
Azaroaren 7ko uholdeen ondotik, Ríos con Vida de Navarra elkarteko Jorge Tenientek idatzia igorri zuen Fiskaltza Orokororrera, zubiak eta presak arriskua sortzen dutela eta bi azpiegitura hauetan berriki egindako lanetan, herriko eta Nafarroako Gobernuko agintariek afera honetan utzikeriaz jokatu dutela salatuz.
Aldiz, erreka inguruko bizilagunek ez dute berdin pentsatzen eta uholde arriskua eta sor daitezkeen kalteak gutitzeko neurriak hartzea (errekaren garbiketa, dragadoa…) bai, baina presa bere horretan mantentzaren alde agertu zen batzarrea.
Kontrabandistari monumentua
Bertze gaien artean, Iturri-Ederra plazan, Santiago elizaren parean, kontrabandistari eskainitako monumentu bat ezartzearen alde agertu zen batzarra. Pedro Mari Esarte historialariak monumentua finantzatzen lagunduko du, berriki gai honen inguruko liburua argitaratu duenak. Herritarrek kontrabandistei errekonozimendua azaldu zieten, Baztango historian «lanbide garrantzitsua» izan delakoan.
Bertze aldetik, Elizondoko konpartsari herriarenak izanen diren bi erraldoi berri eskuratzeko 3.000 ematea erabaki zuen batzarreak. Erraldoien izaera definitzeko herri galdeketa egitekoa zen abenduaren 31n, goiz-arratsaldez Udaletxeko gorapetan jarritako mahai batekin.
Datue aldetik Errotara doan eremuan 104 etxebizitza (32 familiabakarreko eta 12 bloke) eraikitzeko Plan Urbanistikoari dagokionez, gaur egun ezagugarri hauetako hirigintza lanak egiteko beharrik ez dagoela erabaki zuen batzarreak.
Elizondoko preso politikoen senideek egindako proposamenarekin bat eginez, batzarreak atxikimendua eman zion Egin Dezagun Bidea ekimenaren manifestuari.