Baztanek eta orokorrean, eskualde osoak Nafarroako Gobernuaren eskutik jasaten duen diskriminazioa salatu zuten abenduaren 29an herrietako alkateek eta lau kuarteletako juntakideek. Bertze arrazoien artean, azken uholdeen ondotik hondamendi-eremu izendatu ez zelako arrenkura azaldu dute, baina herriei ematen zaien diru-sailen murrizketagatik eta euskarazko komunikabideei egiten zaien diskriminazioagatik ere kexu agertu dira.
Herrietako alkateek eta kuarteletako juntakideek gogorarazi dutenez, Baztan da Nafarroan eremu geografiko handiena hartzen duen herria eta hain sakabanatua dagoen populazioaren beharrak asetzeko zailtasun handia ekartzen du horrek.
Azaroaren 6ko uholdeek kalte handiak egin zituen Baztanen, azpiegiturei eta zerbitzu publikoei 150.000 euro inguruko gastua sortuz. Arlo pribatuan izandako kalteak gehitu beharko ziren. Hala ere, Nafarroako Gobernuak ez zuen hondamendi eremutzat hartu eta horregatik, 100.000 euro baztandarrek ordaindu beharko dituzte beren sakelatik. «Gauza bera Erriberan gertatu izan balitz, berdin jokatuko ote luke Gobernuak?» galdegin dute.
Herriei bideratutako diru-sailen murrizketengatik ere arrenkura agertu dute, «ohiko kudeaketari ez ezik, uholdeen ondorioei ere aurre egin beharko diegu eta oinarrizko beharrak asetzeko baliabide ekonomikoak eskastuko zaizkigu». Modu berean, saihesbidea «oraindik akitu gabe fite irekiko» dela gogoratu dute, Lekarozko altuerako pasabidea eta Elizondoko sarbideko zubia egin gabe daudelako.
Honi guztiari gaineratuz, osasun eta hezkuntza arloetan izandako murrizketak eta euskarazko komunikabideek sufritzen duten «diskriminazioa» ere salatu dute. «Gazteleraz ari diren hedabideek lizentzia lortzeko arazorik ez duten bitartean eta milioitako dirulaguntzak hartzen dituzten bitartean, hurbilen ditugun Xaloa, Xorroxin eta Ttipi-Ttapari lehendik eskasak ziren laguntzak ukatzen zaizkie». Hau, Baztan eta baztandarrentzat errespetu falta handia dela uste dute alkate eta juntakideek.