Celayeta, Echeverria, Echenique, Irigoyen, Jauregui... Berez euskal abizenak diren baina aunitzetan gaztelaniaz idazten direnak euskal grafiaz paratzeko kanpaina eginen du Euskara Batzordeak. Aldi berean, haurrak euskaraz inskribatzeko kanpaina ere izanen da.
Abizenak euskal grafiaz paratzeko erregistro zibilerat joan eta abizena euskal grafiaz paratu nahi dela erratea nahikoa dela adierazi du Euskara Batzordeak: «Erregistroan ematen duten orria norbere datuekin bete eta eskatutako agiriak eraman behar dira: NAN, jaiotza ziurtagiria (epaitegian eskatu) eta errolda agiria (udaletxean eskatu)».
Haurrak euskaraz inskribatzeko kanpaina grafia aldaketarekin batera eginen du Euskara Batzordeak, «erlazio zuzen-zuzena» dutela iritzita. Kasu honetan ere ez dela deus egin beharrik oroitarazi du: «haurra euskaraz inskribatu nahi duzula erran, bertzerik ez». Gisa berean, gurasoetako batek abizena gaztelaniako grafiarekin baldin badu, haurrari ere horrelaxe paratuko diotela ohartarazi du Euskara Batzordeak.