Azaroko berripaper elektronikoa kaleratu du Bilduk. 2012ko udal aurrekontuak ditu, bertzeak bertze, hizpide, eta asmoa «aurrekontu parte hartzaileak egitea» dela adierazi du: «alta, aurten ez dugu aurrekontu parte hartzaileak abiarazteko asti eta modurik izan». Halere, herrietako alkateekin eta herritarrekin bilerak egiteko asmoa badutela gaineratu du. Bildutik «oinarrizko hiru puntu» ikusi dituzte: zerbitzu sozialetan bi langile gehiago kontratatzea eta horren kostua 36.000 euro ingurukoa litzateke; berdintasun programa hasi nahi da horretarako Lekunberriko Udalak utzi duen laguntza aprobetxatuta. Udalarendako 10.000 euro inguru suposatuko lituzke; eta hirugarrenik, herrietako eskoletako garbitzaileen lan baldintzak hobetu nahi dira gizarte segurantza bermatuz eta soldata %18 igoz. Kostua 15.000 eurokoa litzateke. Udaleko aholkulari juridiko eta urbanistikoak aldatuta, 75.000 euro aurreztu direla jakinarazi du Bilduk, eta lorezaintza mantenuaren eta zaborren bilketaren kontratuak berrikusita 100.000 euro.
Azken uberroek ondare publikoan 150.000 euro inguruko kaltea eragin dutela ere badio Bilduk, eta horietatik erdia «premiazko konponketa behar dutenak» omen dira. Gobernuak, premiazko lan horien %70 diruz lagunduko duela erran omen du, eta gainerako guztia Udalak egin beharko omen du. «Gainera, diru hori Udalak aitzineratu beharko du, Gobernuak noiz itzuliko dion jakin gabe».
Bertzetik, Nafarroako Gobernuak murrizketak iragarri ditu lehendik onartuak zeuden asignazioetan, eta hori dela eta, Bilduren arabera, 54.904,67 euro guttiago jasoko lituzke Udalak.
Dagokion eskaera eginez gero, asteburuetan Arizkunenea erabiltzeko aukera egonen dela ere jakinarazi du Bilduk.