Nafarroako Goma Gaineko Sokatira Txapelketan murgilduta daudenean, Euskal Herrikoari ere ekinen diote Amaiurko sokatira taldeek larunbat honetan, azaroak 26. 320, 300 eta 260 kiloko txapelketak izanen dira eta Amaiurkoek 300 kilokoan parte hartuko dute. Hiru talde osatu dituzte.
Kategoria horren barne, hiru jardunaldi jokatuko dira eta larunbat honetan Ibarran (Gipuzkoa) jokatuko dena lehendabizikoa izanen da, 17:00etan. Abenduaren 4an, igandea, bigarren saioa jokatuko dute Berriozarren (Nafarroa), 12:00etatik aitzinera, eta azken saioa abenduaren 17an Arrankudiagan (Bizkaia) eginen da, 17:00etan.
Nafarroako azken saioa igantzin
Abenduaren 3an Nafarroako Goma Gaineko Sokatira Txapelketako laugarren eta azken jardunaldia jokatuko da Igantzin. 600 eta 390 kiloko kategorien bigarren eta azken jardunaldiak jokatuko dira eta 600ekoan Amaiurkoak ariko dira. 17:00etan hasiko da lehia. Igande honetan, azaroak 27, bi maila horietako lehendabiziko jardunaldia jokatuko da Berriozarren, 12:00etan.