Oronozko San Martin Lanbide Eskolako ikasle ohiek bere ikastetxea izan zenean kokatutako egoitza berria estreinatu zuten, San Martin egunez hain zuzen.
Javier Alzuguren ikasle ohien elkarteko presidenteak eta zuzendaritza batzordeko kideek egoitza berriaren giltzak jaso zituzten azaroaren 11n Florentino Goñi Baztango udal zinegotziaren eskutik. Juana Zabaleta Oronozko alkatea ordezkatu zuen Goñik eta gisa horretara, egoitza berria inauguratu zuten. Maribel Almandozek, San Martin ikastetxeko ikasle ohien elkarteko lehen presidentea izan zen Evaristo Gonzalezen alargunak, erakunde honen dokumentazio historikoa eman zien gaur egungo batzordekideei. Hain zuzen, zuzendaritza batzordeak bilera ere egin zuen egun berean eta eskerrak eman zizkioten Baztango Udalari egoitza uzteagatik eta Florencio Lasaga ikasle ohiari, instalazio horien ekipamendua emateagatik.