Euskal Herri eta Nafarroa mailako arpana eta aizkola txapelketak erabakiko dira heldu diren asteburuetan. Azaroaren 6an, erraterako, Euskal Herriko Maila Nagusiko Aizkora Txapelketako finala jokatuko da Elizondon, 12:30etik aitzinera. Floren Nazabal (Etxarri Aranatz, Nafarroa; 42 urte), Juan Jose Lopez (Lezaun, Nafarroa; 42 urte); Iñaki Azurmendi (Arriaran, Gipuzkoa; 39 urte), Joxemari Olasagasti (Igeldo, Gipuzkoa; 52 urte), Aitzol Atutxa (Dima, Bizkaia; 23 urte) eta Luis Txapartegi (Zestoa, Gipuzkoa; 41 urte) ariko dira. Halere, Nazabal min hartua dagoenez, osatzen ez bada Joseba Otaegi zizurkildarrak jokatuko luke bere ordez.
Azaroaren 13an, Nafarroako II. Mailako Arpana Txapelketa jokatuko da Aldatzen, 12:30ean hasita. Bortz bikote ariko dira nor baino nor: Oier Aizkorbe eta Eder Goldarazena (Berriozar), Julen Kañamares (Berriozar) eta Mikel Eugi (Beunza), Xabier Gallardon eta Aitor Danboriena (Etxalar), Unai Igoa eta Imanol Endara (Bera) eta Alberto Oteiza (Larrageta) eta Adrian Berruezco. Txapeldunak mailaz igoko dira.
Egun eta toki berean, Aizkolari Gazteen I. San Martin Saria jokatuko da. Mikel Zabaleta (Leitza), Iker Vicente (Otsagabia) eta Joxean Etxeberria (Ziga) ariko dira. Azaroaren 18an, Nafarroako Maila Nagusiko Aizkora Txapelketako finala jokatuko da Donezteben. Bortz aizkolarik parte hartuko dute: Juan Jose Lopez (Lezaun; 42 urte), Jon Rekondo (Leitza; 26 urte), Donato Larretxea (Arantza; 51 urte), Antonio Senosiain (Olague; 45 urte) eta Ander Erasun (Aurtitz, 21 urte) ariko dira.