Nafarroako Gobernuak iragarri dituen aurrekontuaren murrizketek Baztango proiektu bati baino gehiagori eragin diete. Horixe da, hain zuzen, Irurita, Elizondo eta Elbete lotuko lituzkeen saihesbideko lanen kasua.
Lan hauek egiteko 8.595.300,87 euro inguruko aurrekontua aurreikusia dago eta Gobernuak obretara aurten bideratu beharreko 3.831.666,16 euro «blokeatu» egin ditu. Dena den, lanek aitzinera segituko omen dute, baina baliteke gibeleratzea.
Murrizketen eragina somatu duen bertze egitasmoa Lekarozko Kolegio zaharrean egitekoa zen proiektua da. Obra honetan, 4,1 milioi euroko inbertsioa aurreikusia zegoen eta 3 milioi euro 2012ra gibeleratuak izan dira.
Foru Poliziaren Elizondoko komisaria berriko lanei dagokienez, 803.848,71 euroko aurrekontutik 200.000 euro heldu den urtera gibeleratzea erabaki du Gobernuak.