Elizondoko osasun zerbitzuetan aldaketak izanen dira urriaren 6tik aitzinera

Elizondoko Osasun Etxea Nafarroako Oina­rrizko Osasun Laguntza Hobetzeko Plan berrian sartuko da urriaren 6tik aitzinera, zerbitzuak be­rrantolatzeko eta «pa­zien­teek egin dizkiguten eskaera nagusiei ahalik eta hobekien erantzuteko». Berrantolaketaren helburu nagusiak, hitzordua, beharrezkoa bada, eskatzen den egunean berean izan dadila ziurta­tzea, telefono bidezko atentzioa hobetzea, behar bakoitzerako arreta mota egokiena ematea, Osasun Etxera behin eta berriz etorri beharrik ez izatea nahitaezkoa ez bada, osasunerako hezku­ntza eskaintzea, eta nork bere burua zain­tzen erakustea dira.

Egindako aldaketak direla-eta, bertzelakoa da orain­ hitzordua eska­tzeko prozedura.

Eskaerak sailkatu eta lehentasunak finkatu

Paziente bakoitzari aholkurik egokiena eman ahal izateko, harreralekuan ari diren langileek zer arreta behar den galdetuko diote pazienteei. Horrela, kontu aunitz telefono bidez konpontzen ahalko dira, kontsultara joan beharrik gabe. Administrariek zuzenean emanen dute eran­tzuna, eta, beharrezkoa bada, harremanetan ja­rriko dute eria medikuarekin, erizainarekin edo gizarte-langilearekin.

Hitzorduak

Eriari ahalik lasterren kasu egiten zaiola ziur­ta­tzeko, pazienteak beharrezkoa iruditzen zaion­ gu­ttieneko infor­ma­­zioa eman behar dio adminis­trariari. Honela, berahala laguntza behar duten larrialdiak, egun berean hitzorduak edo ustez behintzat 2-4 egunez esperatzen ahal duten erien hitzordu arruntak bereiziko dira. Administrariarekin batera, eriak­ berak erabakiko du hitzordua egun bererako behar duen ala ez.

Prebentzioa eta hez­kuntza ere indartu nahi dira. Hala, erizainek prota­go­­nismo handiagoa izanen dute egokiak baitira hasierako sintomak baloratzeko.

Telefono zerbitzua

Osasun Etxeak telefono zerbitzu berria izanen du, telefono guztiak okupaturik daudenean hartu ezin diren deiei kasu egiteko. Larrialdia delarik, eriak tekla bat zapaltzen ahalko du, eta, bere deia zuzenean joanen da egiazko larrialdietako telefonora.

Pazienteak uste baldin badu bi edo hiru egunez esperatzen ahal duela, nahi izanez gero, mezu bat uzten ahalko du eran­tzungailuan, izena eta telefonoa erranik. Goizean, Osasun Etxeko admi­nistrariek deitu eginen diote. Posta elektro­nikoz ere eskatzen ahal izanen da ordua (citaselizondo@navarra.es), izena eta telefo­noa utzita.

Lehenbiziko orduan telefono dei guziak ez pilatzeko, ahal dela 08:00etatik 09:30­era ez deitzeko ere eskatu dute, ez bada ezinbertzekoa egun horretan berean hitzordua izatea. Hi­tzordua Internetez ere hartzen ahal da: www.citasalud.navarra.es.

Gaixoen laguntza

Helburuak bete daite­zen, laguntza eskatu diete Urdazubi, Zugarra­mur­di eta Baztango he­rritarrei, «Osasun Etxea hobetzea denon ardura baita». Horrekin batera, Elizondoko Osasun Zentrutik jakinarazi dutenez «arras inportantea da herritar guztiek ongi irakurtzea eskualdean banatuko dugun liburuxkan ematen diren aholkuak. Dudarik izanez gero, aski da deitzea».