Bestak alde batera utzi gabe, ospakizunekin segitu nahi dute Amaiurren eta Arizkunen. Bi herriek egun berak aukeratu dituzte eta asteburu honetan errebestak izanen dira, irailaren 23an eta 24an.
Amaiurren ortziral eta larunbatean
Bi egunez ospatuko dituzte errebestak Amaiurren. Ortziralean, irailak 23, 19:30ean pala txapelketako finala jokatuko da eta 21:00etan herri afaria eginen da elkartean.
Larunbatean, berriz, 14:00etan zikiro jatea eginen da herriko plazan FIDELek alaituta. Ondotik, dantzaldia izanen da eta 00:00etatik aitzinera gaupasa GAUBELA taldearekin.
Arizkunen gaupasa larunbatean
Arizkunen irailaren 24ean eginen dute ospakizuna. Larunbat goizeko11:00etan hasiko diren dianek emanen diote herriko gazteek antolatu duten bestari hasiera. 11:30ean herri lasterketa eginen da eta 14:00etan herri bazkaria. Txartelak Dolaetxean eta Intzan daude salgai, 20 eurotan. Prezio horren barne dago gaueko kontzertuetarako sarrera ere.
Arratsaldean triki-bertso poteoa eginen da eta 20:30ean “Kattalin bere bidearen bile” ikuskizun herrikoiaren txanda izanen da.
23:00etan kontzertuak izanen dira: Aizkor Erauntsia, Zea Mays eta Gozategiren eskutik. Ondotik DJa ere izanen da. Kontzertuetarako sarrerak Zubi Puntan, Intzan, Txokoton eta Dolaetxean eros daitezke, 10 eurotan. Prezio horrekin trago bat ere eskuratzen ahalko da dohainik. Aipatu, 22:00etatik aitzinera bokatak ere eskainiko direla eta kanpina paratzeko aukera ere izanen dela dohainik.