Bere garaian Erdizen harrobia zabaldu nahi izan zuen Magnesitas Navarra enpresak harrobia egin nahi du Zilbetin. 1.600 metroko tunel bat ere egin nahidu eta tunel horrek Kintoko Mankomunitatean edukiko luke sarrera bat. Baztanek ere Kinton bere partea baduenez, zer errana ematen ari da gaia. Garbiñe Elizegi alkateak kontatu digunez, «aurreko Udalak, ekainaren 6an, Kintoko Mankomunitateko bilera batean lurren desafektazioa onartzeko botoa eman zuen tunela egiteko». Elizegik dio oraingo Udalak gaia Batzar Nagusietan eztabaidatu nahi izan duela eta aldi berean, alegazioak aurkezteko epea luzatzeko eskatu diotela Kintoko Mankomunitateari. Hilaren 15a izanen da azken eguna. «Batzarkideak Erro eta Zilbetiko arduradunekin bildu gara. Aldekoak eta kontrakoak ikusita, alegazioak aurkeztea erabaki da. Batzar Nagusitik horretarako batzordea osatu dugu eta irailaren 15a baino lehen alegazioak aurkeztuko dira».