Nafarroako Herri Kirol Federazioak antolatzen duen Herriz Herri txapelketaren bigarren jardunaldia jokatu zen uztailaren 30ean Elizondon. Aurtengoan hiru talde ari dira txapelketan, Berriozar, Ultzama eta Bera, bi proba konbinatuetan lehiatzen.
Berako lehenbiziko jardunaldiko emaitza beretsuak errepikatu ziren. Lehenengo proba konbinatuan (koxkor biltzea, zaku lasterketa, korrika eta arpana) Ultzama izan zen onena, 18 minutu, 37 segundu eta 90 zentesimako denborarekin eta honenbertzez 3 puntu eskuratu zituen. Berak 4 segundu eskas gehiago behar izan zituen (18 minutu, 41 segundu eta 31 zentesima) eta 2 puntu lortu zituen eta Berriozarrek , (19 minutu, 24 segundu eta 86 zentesima), puntu bakarra. Beran 23 segundu atera zizkion Ultzamak herriko taldeari, beraz lehia estuagoa izan zuten Elizondon.
Bigarren proba konbinatuen edo Hiru Kirol proban (lasto botatzea, txinga-eramatea eta ingude altxatzea) Bera izan zen onena eta 3 puntu eskuratu zituen. Gainera, hiru probetan nagusitu ziren Berako kirolariak. Ultzamak 2 puntu eskuratu zituen eta Berriozarrek puntu bakarra.
Herriz herri txapelketa hirugarren eta hondar jardunaldiaren zain gelditzen da orain, baina Herri Kirol Federazioak ez du zehaztu oraindik noiz eta non jokatuko den.