Baztango Euskalgintzak ohar publikoa kaleratu du idazkari lanposturako euskara eskazkizunaren inguruan. Udalak, ekainaren 21ean, ezohiko bilkuran erabaki zuen aurreko Udalak gehiengo osoz egindako behin behineko idazkari lanposturako deialdia bertan behera uztea, euskara jakitea ez zelako eskakizun bezala jasotzen. Baztango Euskalgintzak erabaki horren inguruan egin diren adierazpenak «ezegokiak eta interpretazio okerrekoak» direla erran du eta horiek argitzea dela bere xedea.
Baztango Euskalgintzak bat egiten du Udalak hartu duen erabakiarekin, bere irudiko «ulergaitza baita lehengo udalaren erabakia». Horrez gain, adierazi du Baztango Euskararen Ordenantzak 18/1986-ko Foru Legean oinarrituta daudela eta Udaleko lanpostuetarako euskara ezagutzea beharrezkoa dela. «Kontuan hartu behar da, Baztango biztanleriaren %80tik goiti euskalduna dela eta gurasoen artean ia %100ak seme-alabak euskarazko ereduetan matrikulatzen dituela».
Udal bateko idazkariak berebiziko garrantzia duela azpimarratu nahi izan dute eta hala, «hanka sartze ikaragarria» izanen litzatekeela euskara behar bezala menperatzen ez duen pertsona bat hautatzea. Oharra akitzeko Euskalgintzak baztandar guztiak euskararen alde lan egitera animatu nahi ditu «erabilerak bermatuko duelako euskararen normalizazioa».
Bilduren harridura
Ekainaren 11ko inbestidura saioan NaBaik boto xuria eman zuen alkatea aukeratzerakoan. Horren harira, NaBaik erran zuen «zalantza handiak» dituela Bilduk aurkeztutako gobernu proposamenaren bideragarritasunaz. Udal taldea osatzeko Bildurengandik jasotako lehen eskaintza «osatu gabea» zela adierazi zuen NaBaik, eta hurrengo lau urtetarako proiektuen inguruko konkrezioak eskatu zizkiola. Zentzu horretan, «gobernu programaren edukien gaineko zehaztasun falta» ageri zela gaineratu zuen.
NaBaik Baztanen alde lan egin nahi duela gaineratu zuen eta ez gobernu posizioak eskuratu bertzerik gabe, bere planteamenduekin bat datozen proiektuak babesteko prest azalduz. «Zalantza» horiek tarteko, «seriotasun eta koherentzia politikoz, Udal osaketa bozkatzean boto zuria ematea erabaki genuen».
Bilduk bertze ohar batekin erantzun dio NaBairi, edukiak eta tonuak aunitz harritu dituela argituz: «ordura arte izandako bilkuretan gure programarengandik hurbil zegoela adierazi baitzuen».
Baztango bizilagunek Bilduren programa ongi ezagutzen dutela adierazi dute Bildutik «arlokako proposamenez gain, herritarren parte hartzea bereziki azpimarratu dugulako». Bildutik jakinarazi dute NaBaiko zinegotziari batzorde pare bat bere gain hartzeko proposamena egin ziotela eta eskaintza ardurak elkarbanatzeko izan dela eta ez botere banaketa hutsa.
Udaletxerat sartu direla aurkitu duten egoera ere ez dela erraza azaldu du Bilduk: «udal idazkaririk gabe, egoera ekonomiko koropilatsua, hiltegia hertsia…». Hala, kargua hartu berritan kuestinamendurik ez egiteko eskatu dio NaBairi.